काठमाडौं (हाम्रो खेलकुद) – नेपाली राष्ट्रिय पुरुष फुटबल टोलीले मार्च २१ मा कुवेतको राष्ट्रिय फुटबल टोलीसँग मैत्रीपूर्ण खेल खेल्दैछ । यसका लागि नेपाली टोलीले पछिल्लो एक सातादेखि प्रशिक्षणमा व्यस्त छ ।

नवनियुक्त प्रशिक्षक योहान कालीनले सिधै २३ सदस्यीय नेपाली टोली छनोट गरेर एन्फा मुख्यालय सातदोबाटोको एस्ट्रो टर्फमा नियमित प्रशिक्षण गराइरहेका छन् । उनलाई सहायक प्रशिक्षक किरण श्रेष्ठले साथ दिइरहेका छन् । सिनियर राष्ट्रिय टिममा यसपटक धेरै नयाँ अनुहारहरुले स्थान बनाएका छन् । पहिलो रोजाईका अधिकांश खेलाडीहरु एएफसी यु–२३ च्याम्पियनसिपको टोलीमा रहका कारण कुवेतविरुद्धको मैत्रीपुर्ण खेलका लागि यसपटक नयाँ खेलाडीहरु मौका पाएका छन् ।

सिनियर टिमका पहिलो रोजाईका फरवार्ड बिमल घर्तीमगर, अन्जन विष्ट, अनन्त तामाङ, दिनेश राजवंशी, कमल श्रेष्ठ, सुमन अर्याल, हेमन्त थापामगर, सुनिल बल र तेज तामाङ एएफसी यु–२३ लागि व्यस्त छन् । त्यसैले यसपटक नयाँ खेलाडीहरुले राष्ट्रिय टिमबाट डेब्यु गर्ने सम्भावना छ ।

यसपटक नेपाल एपीएफ क्लबका आशिष लामा पहिलोपटक राष्ट्रिय टिमको क्याम्पमा पर्दा अजित भण्डारी, सुरज विक, रवि सिलवाल, सरोज दाहाल, सन्तोष तामाङ, रवि पासवान, टंक बस्नेत र विमल रानाले लामो समयपछि राष्ट्रिय टोलीको क्याम्पमा पुनरागमन गरेका छन् । यीमध्य अधिकांश खेलाडीले क्याम्पसम्मको यात्रा तय गरिसकेका थिए भने केहिले टोलीमा परेपनि डेब्यु गर्न भने बाँकी रहेको थियो ।

यसैगरी विक्रम लामा, रञ्‍जित धिमाल, रन्जन विष्ट र सुमन लामा चोटबाट पुनरागमन गर्दै टोलीमा फर्किएका छन् । विक्रम गत वर्ष धरानमा भएको बुढा सुब्बा गोल्डकप दौरान चोट बोकेपछि टोलीबाट बाहिर रहेका थिए । सुमन, रंजन र रञ्‍जित पनि साफको छनोटदौरान घाइते भएपछि राष्ट्रिय टोलीमा परेका थिएनन् ।

नेपाली टिमका कप्तान विराज महर्जनले नयाँ प्रशिक्षक योहान कालिनको प्रशिक्षणमा राम्रो भएकाले कुवेतविरुद्ध सकरात्मक नतिजाको लागि खेलिने बताए । ‘नयाँ प्रशिक्षकको प्रशिक्षण शैली निकै राम्रो छ । हामीले छोटो समयमै उहाँको प्रशिक्षणमा अभ्यस्त हुन खोजेका छौं । पहिलो रोजाईका अधिकांश खेलाडीहरु नभएपनि नयाँ खेलाडीहरुले प्रशिक्षणमा मिहेनत गरेका छन्,’ प्रशिक्षण दौरान कप्तान महर्जनले भने ।

यता नेपाली टिमका प्रशिक्षक किरण श्रेष्ठले तयारी राम्रो भैरहेकाले कुवेतविरुद्ध राम्रो खेल पस्कने बताए । उनले टिममा यसपटक थुप्रै नयाँ अनुहार रहेकाले यसपटक सकरात्मक नतिजाकै लागि खेलिने बताए । नयाँ प्रशिक्षक योहान कालिनको प्रशिक्षणमा कुवेतविरुद्धको खेल पहिलो खेल हुनेछ ।

मुख्य प्रशिक्षक योहान कालिनले मैत्रीपुर्ण खेल अनुभव बटुल्ने खेल हुने बताएका छन् । कुवेतपछि २६ मार्चमा मलेसियासँग मैत्रीपुर्ण खेल खेल्ने तय भएपनि उक्त खेल स्थगित भैसकेको छ ।

कुवेत भ्रमणका लागि नेपाली टोली

गोलरक्षक : किरण चेम्जोङ, विकेश कुथु, विशाल श्रेष्ठ
डिफेन्डर : विराज महर्जन, देवेन्द्र तामाङ, अजित भण्डारी, रञ्‍जित धिमाल, सुरज विक, रवि सिलवाल, सरोज दाहाल
मिडफिल्डर : विक्रम लामा, सन्तोष तामाङ, विशाल राई, हेमन गुरुङ, सुजल श्रेष्ठ, सुमन लामा, रवि पासवान, टंक बस्नेत
फरवार्ड : भरत खवास, नवयुग श्रेष्ठ, आशिष लामा, रन्जन विष्ट र विमल राना