एजेन्सी – कप्तान लिओनेल मेसीले दुई गोल र दुई असिस्टसहित शानदार प्रदर्शन गरेपछि यूईएफए च्याम्पियन्स लिग अन्तर्गत बुधबार बार्सिलोनाले लियोनलाई ५-१ को फराकिलो अन्तरले पराजित गरेको छ । समग्रमा ५-१ कै जित दर्ता गरेको बार्सिलोना च्याम्पियन्स लिगको क्वाटरफाइनलमा प्रवेश गरेको छ ।

पहिलो लेगमा गोलरहित बराबरीमा रोकिएपछि बुधबार घरेलु मैदानमा बार्सिलोनाले खेल अवधिभर नै लियोनलाई दबाबमा राख्न सफल भयो । १६ औं मिनेटमा लुइस सुआरेजलाई जेसन डेनाएरले पेनाल्टी क्षेत्रभित्र लडाएपछि बार्सिलोनाले पेनाल्टीमा पाएको थियो । उक्त पेनाल्टीलाई मेसीले चिप गोल गर्दै बार्सिलोनालाई अग्रता दिलाएका थिए । खेलको ३१ औं मिनेटमा सुआरेज नै गोलमा संलग्न भए । उनले वन भर्सेस वनको स्थितिमा पनि कोउटिन्होलाई पास दिएपछि ब्राजिलियन मिडफिल्डरले खालि पोस्टमा गोल गर्दै बार्सिलोनाको अग्रता दोब्बर पारे ।

दोस्रो हाफको ५८ औं मिनेटमा लुकास टुसार्टले भलीमार्फत गोल गर्दै लियोनलाई खेलमा फर्काउने प्रयास गरेका थिए । तर ७८ औं मिनेटमा मेसीले एकल प्रयासमा उत्कृष्ट गोल गर्दै बार्सिलोनाको दुई गोलको अग्रता पुन: स्थापना गरे । लगत्तै मेसीको पासमा नै जेरार्ड पिकेले खालि पोस्टमा गोल गर्दै अग्रता फराकिलो बनाए । खेलको ४ मिनेट समय बाँकी रहँदा मेसीकै पासमा ओस्मान डेम्बेलेले गोल गर्दै बार्सिलोनाको फराकिलो जित पक्का गरे ।

शुक्रबार हुने क्वाटरफाइनल चरणको ड्रले बार्सिलोनाको सेमिफाइनलको सम्भावित प्रतिद्वन्द्वी पनि बताउनेछ । बार्सिलोनाले म्यानचेस्टर सिटि, म्यानचेस्टर युनाइटेड, लिभरपुल, टोटेनहम हट्सपर, युभेन्टस, आयाक्स वा पोर्टोमध्य एक टोलीसँग खेल्नेछ ।