एजेन्सी – युइएफए च्याम्पियन्स लिग फुटबलको प्रि–क्वाटरफाइनलमा इंग्लिस क्लब म्यानचेस्टर सिटीले जर्मन प्रतिद्धन्द्धी साल्के विरुद्ध शानदार र प्रभावशाली जित हात पारेको छ ।

सिटीको घरेलु मैदान इतिहाद स्टेडियममा मंगलबार राति भएको प्रि–क्वाटरफाइनलको दोस्रो लेगको खेलमा सिटीले साल्केमाथ ७–० को शादार जित हात पारेको हो । यससँगै सिटीले समग्रमा १०–२ को फराकिलो जित निकाल्दै क्वाटरफाइनलमा पुग्न सफल भयो । पहिलो लेगमा सिटीले ३–२ को जित हात पारेको थियो ।

सिटीको फराकिलो जितमा फरवार्ड सर्जियो अगुइरोले २ गोल गरे । यस्तै लिरोए साने, रहिम स्ट्रलिङ, बर्नाडो सिल्भा, फिल फोडेन र गाब्रियल जेससले गोल गरे । सिटीको ७ गोलमध्ये एक गोल गरेका सानेले ३ असिस्ट गरे ।

एकपक्षीय र गोलको वर्षा भएको खेलमा सिटीले पहिलो हाफमा ३ र दोस्रो हाफमा ४ गोल गर्न सफल भएको थियो ।

सिटीले खेलको ३५औं मिनेटमा सर्जियो अग्विरोको पेनाल्टी गोलबाट अग्रता बनाएको थियो । बर्नाडो सिल्भालाई साल्केका जेफ्री ब्रुमाल लडाएपछि सिटीले पेनाल्टीको मौका पाएको थियो । जसलाई अग्विरोले सदुपयोग गरे । ३८औं मिनेटमा अग्विरोले व्यक्तिग दोस्रो गोल गरे । ४२औं मिनेटमा लिरोए सानेले गोल गरेपछि सिटीले पहिलो हाफमा ३–० को अग्रता बनायो ।

५६औं मिनेटमा रहिमले लिरोए सानेको पासलाई सदुपयोग गरे । ७१औं मिनेटमा सानेकै पासमा बर्नाडो सिल्भाले गोल गरेपछि सिटीले ५–० को अग्रता बनायो । ७८औं मिनेटमा फिल फोडेनले सानेको अर्काे पासलाई सदुपयोग गरेपछि सिटी फराकिलो जिततर्फ अघि बढ्यो ।

८४औं मिनेटमा बर्नाडो सिल्भाको पासलाई गाब्रियल जेससले गोल गरेपछि सिटीले ७–० को फराकिलो जित आत्मसात ग¥यो । साल्केले भने कुनैपनि समय सिटीको पोस्टमा गतिलो आक्रमण बुन्न सकेन ।