विराटनगर (हाम्रो खेलकुद) – अखिल नेपाल फुटबल संघ (एन्फा) ले साफ महिला च्याम्पियनसिप सुरु हुने पूर्वसन्ध्यामा महिला टोलीलाई नगदसहित सम्मान गरेको छ ।

जापान २०२० ओलम्पिकको फुटबल अन्तर्गत एसिया क्षेत्र छनोटको दोस्रो चरण प्रवेश गरेको र भारतमा भएको हिरो गोल्डकपको उपविजेता टिमलाइ एन्फाले पूर्व घोषित नगद पुरस्कार प्रदान गरेको हो । दुवै प्रतियोगितामा सहभागी खेलाडीहरुले प्रत्येक प्रतियोगिताको ५० हजार प्राप्त गरे ।

दुवै प्रतियोगितामा सहभागी रहेका १७ खेलाडीले एक-एक लाख र अन्यले ५० हजार पुरस्कार पाए । हाल राष्ट्रिय टोलीमा रहेका तीन खेलाडी रेखा पौडेल, उषा नाथ र पुजा रानाले ५० हजार पाए । टोलीमा हाल नरहेका अनु लामा, दिपा न्यौपाने, रन्जना दर्जी, विमला चौधरी, लगायत खेलाडीले ५० हजार प्राप्त गरे । यसबाहेक टोलीमा रहेका मुख्य प्रशिक्षक हरि खड्का, प्रशिक्षक मृगेन्द्र मिश्र र सहायक प्रशिक्षक भगवती रानामगरले जनही १-१ लाख रुपैयाँ पाए । टोलीमा रहेका फिजियोलगायत अफिसियलहरुले ५०-५० हजार प्राप्त गरे ।

स्थानीय खेलाडीलाई विशेष सम्मान

विराटनगर महानगरपालिका मेयर भिम पराजुलीले राष्ट्रिय टोलीले सफलता हात पारे नगदसहित सम्मान गर्ने प्रतिवद्धता व्यक्त गरे । यसैबीच उनले मोरङका तीन खेलाडीलाई महानगरको सद्भावना दुत नियुक्त गर्ने घोषणा गरे । राष्ट्रिय टोलीका सरु लिम्बू, मनमाया लिम्बू र कविता धिमाललाई बिराटनगर महानगरपालिकाको दुत बनाउने घोषण गरेका छन ।