सुबास हुमागाईं, विराटनगर

भारतीय राष्ट्रिय महिला फुटबल टोलीकी प्रशिक्षक मेमोल रकीको नेपालसँग पुरानो सम्बन्ध छ । वि.सं. २०७२ को महाभूकम्पमा रकी यू-१४ टोलीको मुख्य प्रशिक्षकको भूमिकामा नेपाल आएकी थिइन् । अहिले उनी सिनियर टोलीको जिम्मेवारी सम्हाल्दै लगातार पाँचौ उपाधि जित्ने लक्ष्यसहित विराटनगर आएकी छिन् ।

सन् २०१५ मा नेपालले आयोजना गरेको एएफसी यू-१४ गर्ल्स रिजनल च्याम्पियनसिप २०१५ (साउथ एन्ड सेन्ट्रल) को तेस्रो स्थानको खेल खेल्न तयार रहेको बेलामा भूकम्प आएको थियो । दशरथ रंगशालामा त्यसबेला सेमिफाइनलमा पराजित अर्को टोली इरान र भारत दुवै ड्रेसिङ रुममा रहेका थिए । वार्मअप सेसनका लागि तयार रहँदै गर्दा भूकम्प आएपछि दुवै टोलीका खेलाडी मैदानको बीच भागमा आएर बसेका थिए । त्यसबेला टोलीकी मुख्य प्रशिक्षक मेमोल रकीले खेलाडीलाई एकतृत राख्दै स्थिति साम्य परेकी थिइन् ।

उक्त प्रतियोगिताको सेमिफाईनलमा नेपालले भारतलाई १-० ले पराजित गर्दै फाइनलमा स्थान बनाएको थियो । उक्त खेलमा निर्मला उपाध्यायले नेपालको लागि एकमात्र गोल गरेकी थिइन् । अर्को सेमिफाइनलमा बंगलादेशले इरानलाई हराएको थियो । नेपाल र बंगलादेश फाइनल खेल्न टिम होटेल छाड्ने तयारीमा रहँदा भूकम्प आएको थियो । उक्त प्रतियोगिताको फाइनल स्थगित भएपछि केहि महिनामै पुन: नेपालमा खेलाइएको थियो जसमा बंगलादेश १-० ले विजयी रहेको थियो ।

महिला साफ च्याम्पियनसिपको पूर्वसन्ध्यामा नेपाल फर्किएकी भारतीय टोलीकी प्रशिक्षक रकिले उक्त दिनको सम्झना गरिन् । ‘ हामीले त्यसबेला नेपाल छाडेर जानुपरेको थियो । त्यो समय निकै कठिन रहेको थियो । हामीले त्यो दिन जिन्दगीभर भुल्ने छैनौं,’ उनले थपिन्, ‘ यसपटक पनि हामी कहिल्यै नबिर्सिने क्षण बनाउने लक्ष्य लिएर नै आएका छौं ।’

प्रतियोगितामा लगातार चार उपाधि जितेको भारतले यसपटक तुलनात्मक रुपमा युवा खेलाडी समेटेर टोली खडा गरेको छ । प्रशिक्षक रकीले युवा जोशले अझै राम्रो प्रदर्शन गर्न टोली आतुर रहेको बताइन् । ‘हामीले युवा टोलीलाई छनोट गर्नुको मुख्य कारण मैदानमा देखाउने प्रदर्शनले बताउनेछन् । हामीले लगातर पाँच उपाधि जित्ने लक्ष्य लिएर यहाँ आएका छौं,’ उनले थपिन्, ‘पछिल्ला केहि खेलमा हामीले आफ्नो कमजोर पाटो भेटेका छौं र त्यसलाई सुधार गर्ने अवसर हामीसँग छ । फुटबलमा कमजोर प्रतिद्वन्द्वी कोहि हुँदैन, मैदानमा राम्रो खेल्नपर्ने दबाब हुन्छ ।’

भारतको समूहमा माल्दिभ्स र श्रीलंका रहेको छ । टोलीकी कप्तान आशालता देवीले पनि राम्रो तयारी रहेकाले उपाधि जित्ने नै लक्ष्य लिएको बताइन् । ‘ हाम्रो टोली युवा खेलाडीले भरिपूर्ण छ । तर हामीले सबै खेलाडीमा विश्वास गरेर ल्याएका हौँ । राम्रो खेल्नेमा विश्वस्त छु,’ उनले भनिन्, ‘ हामीले यसपटक थप मिहिनेत गरेर आएका छौं । उपाधि जित्ने लक्ष्य प्राप्त गर्न सबैले कडा मिहिनेत गर्नेछौं ।’

पत्रकार सम्मेलनको भिडियो: