एजेन्सी – पीएसजीका स्टार युवा फरवार्ड किलियन एमबाप्पेले यूईएफए च्याम्पियन्स लिगको क्वाटरफाइनलमा म्यानचेस्टर युनाइटेडसँग नाटकीय हार बेहोर्दै प्रतियोगिताबाट बाहिरीपछि सुत्न पनि नसकेको बताएका छन् ।

पहिलो लेगमा युनाइटेडको मैदानमा २-० को जित दर्ता गरेको पीएसजीले दोस्रो लेगमा ३-१ को हार बेहोरेपछि क्वाटरफाइनल पुग्न बन्चित भएको थियो । युनाइटेडको जितमा मार्कस रासफर्डले इन्ज्युरी समयमा पेनाल्टी गोल गरेका थिए । कतारी शेखको आगमनपछि ,मोटो रकम खर्चेको पीएसजीले क्वाटरफाइनल चरण पनि पार गर्न सकेको छैन । एमबाप्पेले दोस्रो लेगको नतिजापछि आफू सुत्न पनि नसकेको बताएका छन् ।

‘म स्तब्ध छु । हामीले यहाँसम्म आउन निकै मिहिनेत गरेका थियौं । म सुत्न पनि सकेको छैन । मलाई लाग्छ हाम्रो टोलीको लगभग सबैको यहि अवस्था छ,’ उनले भने, ‘ हामीले चाहेर पनि यसलाई बिर्सन सकिरहेका छैनौं । च्याम्पियन्स लिग हाम्रो प्रमुख प्राथमिकतामा रहेको प्रतियोगिता थियो । मैदान पनि समर्थकले भरिपूर्ण थियो, तर नतिजा भने हाम्रो पक्षमा आएन । हामीले चाहेको नतिजा यो थिएन ।’

फ्रान्सलाई विश्वकप उपाधि जिताउन महत्त्वपूर्ण भूमिका निर्वाह गरेका २० वर्षीय एमबाप्पेले अर्को सिजन पीएसजीमै रहने पनि पक्का गरे । ‘हामी यस प्रतियोगिताबाट बाहिरिनु र मेरो व्यक्तिगत स्थितिलाई जोड्नु कुनै औचित्य छैन । म यहीं रहेर हाम्रो लक्ष्यलाई पुरा गर्ने योजनामा छु । मेरो यो निर्णय परिवर्तन हुने छैन,’ एमबाप्पेले थपे ।