एजेन्सी – इंग्लिस प्रिमियर लिग फुटबलमा लिभरपुलले बर्नलीलाई पराजित गरेपछि प्रिमियर लिगको उपाधि होड रोमाञ्चक बनेको छ ।

बर्नलीमाथि ४–२ को जितसँगै शीर्षस्थानको म्यानचेस्टर सिटीसँगको अंक दुरी १ मा झार्दै लिभरपुल उपाधि होडमा उभिएको हो । लिगको ८ खेल बाँकी रहँदा शीर्षस्थानको म्यानचेस्टर सिटीको ३० खेलबाट ७४ अंक रहेको छ । समान खेलबाट लिभरपुलको ७३ अंक रहेको छ ।

घरेलु मैदानमा लिभरपुलको जितमा साडियो माने र रोबर्टाे फिर्मिनोले समान २ गोल गरे । बर्नलीका एस्ले वेस्टवुड र जोहान वर्ग गुडमुन्डसनले समान १ गोल गरे ।

खेलको छैटौ मिनेटमा एस्ले वेस्टवुडको गोलबाट पाहुना टोली बर्नलीले खेलमा अप्रत्यासित अग्रता बनाएको थियो । कर्नरबाट आएको बललाई एस्लेले सदुपयोग गरेका थिए । तर, बर्नलीको त्यो अग्रता लामो समय टिकेन । १९औं मिनेटा लिभरपुलले बराबरी गोल फर्काउन सफल भयो ।

मोहम्मद सलाह र जर्जिन्हो विज्नल्डमको वान टु वान पासमा बर्नलीका गोलरक्षक झुक्किदा फिर्मिनोले गोल गरेका थिए । २९औं मिनेटमा साडियो मानेले भलीमार्फत सुन्दर गोल गरेपछि लिभरपुलले खेलमा २–१ को अग्रता बनायो ।

६९औं मिनेटमा बर्नलीका गोलरक्षक टोम हिटनको गल्तीमा फिर्मिनोले व्यक्तिगत दोस्रो तथा टिमका लागि तेस्रो गोल गरेपछि लिभरपुल ३–१ ले अघि बढ्यो ।

इन्ज्युरी समयको पहिलो मिनेटमा बर्नलीका जोहानले एक गोल गरेपछि खेल ३–२ को अवस्थानमा पुगेको थियो । तर, इन्ज्युरी समयको चौथो मिनेटमा मानेले गोल गर्दै लिभरपुललाई ४–२ को जित दिलाए ।