म्युनिख (एजेन्सी) – वल्सवर्गमाथि आर्धा दर्जन गोल गर्दै साविकको विजेता बायर्न म्युनिख जर्मन बुन्डेस लिगाको शीर्ष स्थानमा फर्किएको छ ।

बायर्नले घरेलु मैदानमा वल्सवर्गमाथि ६–० को फराकिलो जित निकाल्दै बुन्डेस लिगाको शीर्षस्थानमा फर्किएको हो । बायर्ननले बोरुसिया डर्टमन्डलाई गोलअन्तरमा पछि पारेको हो । समान २५ खेलबाट समान ५७ अंक भएपनि बायर्न गोल अन्तरमा अघि बढेको हो ।

बायर्नको फराकिलो जितमा रोबर्टाे लिवान्डोस्कीले दुई तथा सर्जि जिनाव्री, हामेस रोड्रिग्वेज, थोमस मुलर र जोसुवा किम्मिचले समान १ गोल गरे । बायर्नले पहिलो हाफमा २–० को अग्रता बनाउदा दोस्रो हाफमा थप चार गोल गर्न सफल भएको थियो ।

३४औं मिनेटमा जिनाब्रीको गोलबाट बायर्न अघि बढेको थियो । ३७औं मिनेटमा रोबर्टाे लिवान्डोस्कीले अग्रता दोब्बर बनायो । ५२औं मिनेटमा हामेसले गोल थप्दा बायर्न ३–० ले अघि बढ्यो ।

एकपक्षीय बनेको खेलको ७६औं मिनेटमा थोमस मुलरले गोल थपे । ८२औं मिनेटमा किम्मिचले गोल गर्दा बायर्नले ५–० को अग्रता बनायो । ८५औं मिनेटमा रोबार्टाेले व्यक्तिगत दोस्रो तथा टिमका लाथि छैटौ गोल गर्दै बायर्नलाई ६–० को फराकिलो जित दिलाए ।

शनिबारै भएको अर्काे खेलमा बोरुसिया डर्टमन्डले भिएफबी स्टुटगार्डमाथि ३–१ को जित निकालेपनि शीर्ष स्थानमा रहन सकेन ।

बोरुसियाको जितमा मार्काे रिउस, फ्रान्सिस्को अल्कासेर र क्रिस्टियन पुलिसिकले गोल गरे । स्टुगार्डका मार्क ओलिभर किम्फले एक गोल फर्काए ।