काठमाडौं (हाम्रो खेलकुद) – नेपाली यू-२३ राष्ट्रिय पुरुष फुटबल टोलीले यसै महिना सुरु हुने एएफसी यू-२३ च्याम्पियनसिपको छनोट चरणका लागि एन्फा कम्प्लेक्स सातदोबाटोमा तयारी गरिरहेको छ ।

राष्ट्रिय टोलीका समेत खेलाडी सम्मिलित प्रशिक्षणमा लिगका उत्कृष्ट खेलाडीहरु समेटेर पहिलो चरणको छनोट जारी छ । मुख्य प्रशिक्षक बालगोपाल महर्जन र प्रशिक्षक सुमन श्रेष्ठले पछिल्लो सातादेखि प्रशिक्षण सुरु गरेका हुन् । तुलनात्मक रुपमा निकै बलिया टोलीविरुद्ध नेपालले प्रतिस्पर्धा गर्दैछ । नेपालको समूहमा आयोजक कतारसँगै ओमान र अफगानिस्तान रहेका छन् ।

टोलीका प्रशिक्षक सुमन श्रेष्ठले छोटो तयारी समय भएपनि लिग र मोफसलका प्रतियोगिताले खेलाडीको फिटनेस राम्रो रहेकाले प्रशिक्षण राम्रो भइरहेको बताए । ‘ हामीले छोटो समय पाएपनि योजनाअनुसार नै प्रशिक्षण अगाडी बढाएका छौं । दोस्रो चरणमा पुग्ने लक्ष्य भएपनि विपक्षी टोलीहरु निकै बलिया छन् । हामीले रक्षात्मक रणनीति लिँदै काउन्टर अट्याकमा खेल्ने प्रयास गर्नेछौं । प्रशिक्षण पनि त्यसैअनुसार जारी राखेका छौं,’ उनले भने ।

हाल प्रशिक्षणमा २८ खेलाडी समावेश छन् भने दुई खेलाडी संकटासँग भारतमा जारी एक प्रतियोगितामा व्यस्त रहेकाले उपस्थित छैनन् । आइतबारसम्म ती खेलाडी पनि टोलीमा आइसक्ने र अन्तिम टोलीको छनोट चाडैं हुने टोलीका व्यवस्थापक दिनेश ब्यन्जनकारले जानकारी दिए । नेपाली टोली हालसम्म यू-२३ एएफसी च्याम्पियनसिपमा छनोट हुन सकेको छैन ।

नेपालको खेल तालिका :
२२ मार्च २०१९ – १९:४५ बजे – नेपाल विरुद्ध ओमान
२४ मार्च २०१९ – २१:४५ बजे – कतार विरुद्ध नेपाल
२६ मार्च २०१९ – २१:४५ बजे – नेपाल विरुद्ध अफगानिस्तान

प्रशिक्षणको तस्बिर हेर्न यहाँ थिच्नुहोस्