काठमाडौं (हाम्रो खेलकुद) – सहिद स्मारक ए डिभिजन लिगको च्याम्पियन टोली सिग्नेचर मनाङ मर्स्याङदी क्लबले खेलकुद पोशाक कम्पनी केल्मीको सामाग्री प्रयोग गर्ने भएको छ ।

राजधानीमा बुधबार मनाङ मर्स्याङदी क्लबका अध्यक्ष छिमी उर्केन गुरुङ र केल्मीका लागि नेपालको अधिकारिक विक्रेता कामारु ट्रेडिङ प्रालिका निर्देशक प्रदिप न्यौपानेले सम्झौता पत्र आदान प्रदान गरे । सम्झौताअनुसार मनाङले तीन वर्ष अवधिसम्म केल्मीको खेल सामग्री प्रयोग गर्नेछ ।

केल्मीले वार्षिक रुपमा २-२ सेट होम र अवे जर्सी, प्रशिक्षण जर्सी, पोलो टि-सर्ट, मोजा लगायत अफिसियलहरुका लागि आवश्यक टि-सर्ट उपलब्ध गराउनेछ । नेपाली राष्ट्रिय फुटबल टोलीले पनि केल्मीकै खेल सामाग्री प्रयोग गर्दै आएको छ । मंगलबार एक समारोहबीच राष्ट्रिय टोलीको जर्सी सार्वजनिक गरिएको थियो । मनाङको पनि जर्सी केहि सातामा सार्वजनिक हुनेछ ।

केल्मीका प्रतिनिधि न्यौपानेले नेपाली फुटबलको विकासमा हातेमालो गर्ने कम्पनीको अवधारणालाई क्लबस्तरमा पनि सुरुवात गर्ने लक्ष्यसहित मनाङसँग सम्झौता गरेको बताए । ‘ हाम्रो लक्ष्य नेपाली फुटबलको विकास गर्नु हो । मनाङसँग सम्झौता भनेको क्लब फुटबलमा हाम्रो सुरुवात हो । आगामी दिनमा यसलाई अझै विस्तार गर्दै लाग्ने हाम्रो योजना छ,’ न्यौपानेले भने ।

मनाङले अर्को महिना सुरु हुने एएफसी कपमा केल्मीको सामग्री नै प्रयोग गर्नेछ । लिग विजेताको हैसियतले मनाङले एएफसी कपमा नेपालको प्रतिनिधित्व गर्दैछ । मनाङ रहेको समूहमा बंगलादेशको अबहानी लिमिटेड, भारतको मिनेर्भा पन्जाब र दक्षिण एसियाली प्लेअफको विजेताले प्रतिस्पर्धा गर्नेछन् ।

एएफसी कप समूह चरण खेल तालिका :
३ अप्रिल – विरुद्ध अबहानी लिमिटेड – एन्फा कम्प्लेक्स
१७ अप्रिल – विरुद्ध प्लेअफ विजेता – तय हुन बाँकी
१ मे – विरुद्ध मिनेर्भा पन्जाब – कालिंगा रंगशाला
१५ मे – विरुद्ध मिनेर्भा पन्जाब – एन्फा कम्प्लेक्स
१९ जुन – विरुद्ध अबहानी लिमिटेड – बंगबन्धु रंगशाला
२६ जुन – विरुद्ध प्लेअफ विजेता – एन्फा कम्प्लेक्स