एजेन्सी – डच क्लब आयाक्सले रियल म्याड्रिडको घरेलु मैदान सान्टियागो बर्नाबाउमा उत्कृष्ट प्रदर्शन गर्दै ४-१ को जित दर्ता गरेपछि च्याम्पियन्स लिगको क्वाटरफाइनलमा स्थान पक्का गरेको छ । समग्रमा ५-३ को जित दर्ता गरेको आयाक्सले २२ वर्षपछि नकआउट चरणमा जित दर्ता गरेको हो ।

पहिलो लेगमा २-१ ले पछाडी परेको आयक्सले खेलको सातौं मिनेटमा हाकिम जिएकको गोलमा स्कोर बराबरी गरेको थियो । १८ औं मिनेटमा डेविड नेरेसले गोल गर्दै पाहुना टोलीलाई समग्रमा अग्रता दिलाए । दुवै गोलमा मिडफिल्डर डुसान टाडीचले असिस्ट दिएका थिए । उनै टाडीचले ६२ औं मिनेटमा पेनाल्टी क्षेत्रबाहिरबाट उत्कृष्ट गोल गर्दै आयाक्सलाई बलियो स्थितिमा पुर्याए ।

लगातार चौथो च्याम्पियन्स लिग उपाधिको लक्ष्यमा रहेको रियल ७२ औं मिनेटमा मार्को एसेन्सियोको गोलसँगै खेलमा पुनरागमन गर्ने सम्भावना देखिएको थियो । तर त्यसको दुई मिनेटमा लासे स्कोनेले फ्रिकिकमा दर्शनीय गोल गर्दै आयाक्सको जित पक्का गरे । प्रतिबन्धमा रहेका डिफेन्डर सर्जियो रामोसबिना उत्रिएको रियल खेल अवधिभर समस्यामा देखिएको थियो । इन्ज्युरी समयमा नाचो फर्नान्डेज दोस्रो पहेंलो कार्ड पाउँदै मैदान छाड्न बाध्य भए ।

आयाक्स घरेलु मैदानमा २-१ ले पछाडी रहेर पनि खेल उल्ट्याउने पहिलो टोली बनेको छ । सन् २०१२-१३ मा चेल्सीपछि साविक विजेता क्वाटरफाइनलमा नपुगेको यो पहिलो पटक हो । रियलले युरोपेली खेलअन्तर्गत घरेलु मैदानमा भोगेको यो फराकिलो हार हो । आयाक्सले अग्रता लिएको पछिल्लो ४८ च्याम्पियन्स लिग खेलमा पराजय भोगेको छैन ।