एजेन्सी – स्पेनिस महारथी रियल म्याड्रिडका समर्थकहरुले आफ्ना टोलीका फरवार्ड ग्यारेथ बेललाई गरेको व्यवहार लज्जास्पद रहेको उनका एजेन्ट जोनाथन बार्नेटले जनाएका छन् ।

पछिल्लो समय अपेक्षित लय समात्न नसकेका बेलले रियलको पहिलो रोजाइमा स्थान बनाउन निकै कसरत गर्नुपरेको छ । यसैकारण पनि खेलाडी, क्लब र समर्थकबीच केहि असहज परिस्थिति सिर्जना भएको छ । उनको खराब प्रदर्शनका कारण समर्थकहरुले बेललाई पछिल्ला खेलहरुमा खुलेआम आलोचना गर्दै आएका छन् । बेलका एजेन्ट बार्नेटले भने बेलप्रतिको यो व्यवहार न्यायोचित नभएको बताएका छन् ।

‘रियलका समर्थकहरुले बेलको गोलबारे लामो समयसम्म चर्चा गर्नेछन् । उनीहरु आफ्नो व्यवहार देखेर लाज लाग्नुपर्छ,’ उनले भने, ‘ उनी रियलमा राम्रो सम्मान पाउनुपर्ने खेलाडी हुन् । जस्तो व्यवहार अहिले बेलले पाएका छन्, त्यो स्वागतयोग्य छैन ।’ बेलले जारि सिजन ३३ खेल खेल्दै १३ गोल गरेका छन् । उनले यसै सिजन क्लबका लागि १ सय गोल पनि पूरा गरेका छन् ।

‘बेलले क्लब छोड्छन् भन्ने हल्लाले हामीलाई निकै समस्या भएको छ । उनले क्लबमा आएको ६ वर्षमा सम्भव भएको सबै उपाधि जितेका छन् । उनी विश्वका उत्कृष्ट खेलाडीमा पर्छन् । रियलका समर्थक बेललाई आफ्नो टोलीमा खेलेको देख्दा खुसी हुनुपर्छ,’ बार्नेटले थपे ।