बिर्तामोड (हाम्रो खेलकुद) – चौथो मगमग झापा गोल्डकप अन्तर्गतको दोस्रो दिनको खेलमा नेपाल एपीएफ क्लबले मोरङ ११ लाई १–० ले पराजित गर्दै क्वाटरफाइनलमा प्रवेश गरेको छ । एपीएफले अब त्रिभुवन आर्मीको सामना गर्नेछ ।

मोरङका तीन खेलाडी अन्य क्लबमा अनुबन्धित भएको भन्दै एपीएफले अपिल गरेपछि खेल २३ मिनेट रोकिएको थियो । मोरङले अन्य क्लबको रिलिज पेपर देखाउन नसक्दा खेल रोकिएपनि एपीएफको माथिल्लो निकायबाट खेल खेल्न निर्देशनपछि खेल पुनः सुचारु भएको थियो ।

पहिलो हाफको अतिरिक्त समयको नवौं ९ मिनेटमा एपीएफले हरि कार्कीको गोलमा अग्रता लियो । हरिले मोरङका गोलरक्षक किशोर गिरी अगाडी बढेको समयमा रमेश दंगालको हेडर पासमा गोल गरेका थिए । गोलकर्ता हरि खेलको म्यान अफ दी म्याच बन्दै १५ हजार रुपैयाँ पाए । सोमबारको खेल मगमग झापा ११ र हङकङ नेप्लिज एकाडेमीबीच हुनेछ ।

हिम इलेक्ट्रोनिक्सले प्रदान गरेको एक जना भाग्यशाली दर्शकको पुरस्कार अर्जुनधारा नगरपालिकाका पदम चोङवाङले प्राप्त गरेका छन् । उनले २० इन्चको एलइडी टेलिभिजन प्राप्त गरेका थिए । प्रतियोगिताको बिजेताले १२ लाख ५५ हजार र उपबिजेताले ६ लाख ५ हजार रुपैया नगद पाउँने छ । प्रतियोगिताको फाइनल फागुन २७ गते हुने छ ।

खेलपछि पोष्ट म्यच कन्फ्रेन्समा बोल्दै एपीएफका प्रशिक्षक रत्नकाजी महर्जनले फिफाको नियमानुसार मोरङका खेलाडी बिरुद्ध अपिल गरेकाले केही समय खेल रोकिएको बताए । उनले निरन्तर खेल्नुपर्दा मोरङसँग कठिन जित निस्किएको बताए । पराजित टीमका प्रशिक्षक सञ्जिव बुढाथोकीले मानसिक रुपमा दवाव दिएर र खेलाडीमा बिवाद झिकेर प्रेसरमा खेल्दा पराजित हुनुपरेको बताए । उनले मोरङको टीम कलेक्सन भएकाले वपनि तालमेल नमिलेर हार ब्यहोर्नु परेको स्विकार गरेका छन् ।