एजेन्सी – इंग्लिस प्रिमियर लिग फुटबलमा म्यानचेस्टर युनाइटेडले साउथह्याम्पटनमाथि जित निकालेको छ ।

घरेलु मैदान ओल्ड ट्राफोर्डमा शनिबार राति भएको खेलमा युनाइटेडले साउथह्याम्पटनलाई ३–२ ले पराजित गरेको हो ।

युनाइटेडको जितमा रोमेलु लुकाकुले दुई तथा आन्द्रेस पेरेराले एक गोल गरे । साउथह्याम्पटनका यान भालिरे र जेम्स वार्ड प्रोजले समान १ गोल गरे ।

घरेलु मैदानमा युनाइटेड यान भालिरेको गोलबाट पहिलो हाफमा १–० ले पछि परेको थियो । ५४औं मिनेटमा डिएगो डालोटको पासमा आन्द्रेस पेरेरा बराबरी गोल फर्काएपछि युनाइटेड खेलमा फर्किएको थियो ।

५९औं मिनेटमा आन्द्रेसको पासमा रोमेलु लुकाकुल गोल गरेपछि युनाइटेडले खेलमा २–१ को अग्रता बनाएको थियो । ७५औं मिनेटमा साउथह्याम्पटनका जेम्सले खेललाई पुनः २–२ गोलको बराबरीमा ल्याएका थिए ।

८९औं मिनेटमा रोमेलु लुकाकुले व्यक्तिगत दोस्रो तथा टिमको लागि तेस्रो गोल गर्दै टिमको जित सुनिश्चित गरेका थिए । इन्ज्युरी समयको थप गरिएको पाँचौ मिनेटमा युनाइटेडले पेनाल्टीको मौका पाएपनि पल पोग्वाको प्रहार गोलरक्षकले बचाइदिएका थिए ।

जितसँगै युनाइटेडको २९ खेलबाट ५८ जोडेर चौथो स्थानमा यथावत रहेको छ । साउथह्याम्पटन २७ अंकसहित रेलिगेसन जोनभन्दा १ स्थान माथि छ ।