एजेन्सी – रियल म्याड्रिडका युवा विंगर भिनिसियस जुनियर ब्राजिलको राष्ट्रिय टोलीमा पहिलोपटम परेका छन् । मार्च तेस्रो सातामा हुने मैत्रीपूर्ण खेलका लागि प्रशिक्षक टिटेले शुक्रबार घोषणा गरेको टोलीमा अटाएका हुन् ।

ब्राजिलले मार्च २३ मा पानामा र मार्च २६ मा चेक गणतन्त्रविरुद्ध मैत्रीपूर्ण खेल खेल्ने तालिका रहेको छ । नियमित कप्तान नेयमार चोटका कारण टोलीमा नपर्दा भिनिसियसले अवसर प्राप्त गरेका हुन् । गत सिजन मात्र ब्राजिलको फ्लामेङगोबाट रियल म्याड्रिड अाइपुगेका भिनिसियसले रियलका लागि यस सिजन लगातार राम्रो प्रदर्शन गरिरहेका छन् । १८ वर्षीय उनले २६ खेलमा ४ गोल पनि गरेका छन् ।

प्रशिक्षक टिटेले भिनिसियस स्तरिय खेलाडी भएकै कारण टोलीमा पर्न सफल रहेको बताए । ‘ उनले अहिले निकै अपेक्षा गर्ने क्लबबाट खेलिरहेका छन् । उनलाई अहिले दवाव दिनुभन्दा खुलेर खेल्ने वातावरण सिर्जना गर्ने प्रयासमा छु,’ उनले भने, ‘ अहिले उनले राष्ट्रिय टोलीबाट अनुभव बटुल्न जरुरी छ । ब्राजिलको जर्सीमा खेल्दाको भावना उनले बुझुन् भन्ने मेरो चाहना छ ।’

ब्राजिलको टोलीमा रियलका अर्का खेलाडी मार्सेलो भने अटाएका छैनन् । पछिल्लो समय निकै अालोचना खेपिरहेका मार्सेलो लामो समयपछि टोलीबाट बाहिरिएका हुन् । पेरिस सेन्ट जर्मेनका डिफेन्डर ड्यानी अाल्भेसले टोलीमा पुनरागमन गरेका छन् ।

ब्राजिल टोली :

गोलरक्षक : एलीसन, एडरसन, वेभरसन

डिफेन्डर : एलेक्स सान्ड्रो, ड्यानी अाल्भेस, ड्यानिलो, फिलिपे लुइस, मार्किन्होस, थियागो सिल्भा, मिरान्डा, एडर मिलिसाअो

फरवार्ड : एभरटन, रोबर्टो फिर्मिनो, ग्याब्रिएल जेसस्, रिचार्लिसन, भिनिसियस जुनियर

मिडफिल्डर : क्यासेमिरो, एलन, अार्थर, फाबिन्हो, फिलिपे एन्डरसन, लुकास पाकेटा, फिलिपे कोउटिन्हो