एजेन्सी – इंग्लिस लिग कप अन्तर्गत आइतबार म्यानचेस्टर सिटीले चेल्सीलाई टाइब्रेकरमा ४-३ ले पराजित गर्दै उपाधि जित्यो । खेलको निर्धारित ९० मिनेट र अतिरिक्त ३० मिनेट समयमा दुवै तर्फबाट गोल नहुँदा खेल टाइब्रेकरमा पुगेको थियो ।

खेलमा टाइब्रेकर सुरु हुनुभन्दा केहि बेर अगाडी निकै आश्चर्यजनक घटना घट्यो । चेल्सीका गोलरक्षक केपा अर्रिजबगालाले नियमित खेल अवधिमा चेल्सीका थुप्रै आक्रमण विफल पारे । यसक्रममा उनी केहि घाइते पनि देखिएका थिए । प्रशिक्षक सार्रीले टाइब्रेकरका लागि उनको स्थानमा वैकल्पिक गोलरक्षक विली काबालेरोलाई ल्याउने तयारी गरे । तर, रेफ्रीले खेलाडी परिवर्तन हुने बोर्ड देखाउँदा केपाले बाहिर निस्कन मानेनन् ।

प्रशिक्षक सार्री आफैंले उनलाई बाहिर आउन भने । तर केपाले कुनै हालतमा मैदान छाड्न मानेनन् । उनले डिफेन्डर डेविड लुइज र कप्तान सेजार एज्पिलीक्वेटालाई पनि सोहि संदेश दिन भने । सार्री रिसले चुर हुँदै बेन्चमा फर्किए । उनको हाउभाउले उनको रिस असामान्य रहेको प्रष्ट देखिन्थ्यो । सहायक प्रशिक्षक जियाफ्रान्को जोलाले पनि केपालाई बाहिर आउन भने तर उनले मानेनन् । केपाले लगातार मैदान बाहिरिन अस्विकार गरेपछि रेफ्री जोन मसले प्रशिक्षकसँग छलफल गरे र खेल सुचारु गरे ।

टाइब्रेकरमा केपाले लेरोय सानेको पेनाल्टी रोकेपनि चेल्सी विजयी हुन सकेन । जोर्जिन्होको प्रहार रोकिनु र लुइजको पेनाल्टी पोस्टमा लगेर फर्कनु चेल्सीको लागि दुर्भाग्य रहयो । खेलपछि पत्रकारसँग बोल्दै सार्रीले केपासँग उचित समन्वय गर्न नसक्दा यस्तो समस्या आएको बताए । ‘हामीले केपा चोटका कारण खेल्न सक्दैनौं भन्ने बुझेका थियौं । त्यसैले परिवर्तन गर्न चाहेका थियौं । टोलीका डाक्टर बेन्चमा फर्केपछि मात्र हामीले सहि स्थिति बुझ्यौं । केपाले गर्न चाहेको कदम ठिक थियो, हेर्दा मात्र केहि नराम्रो देखिएको हो,’ उनले भने ।

यता केपाले पनि आफूले प्रशिक्षकलाई अटेर नगरेको भन्दापनि आफ्नो स्वास्थ्य स्थिति ठिक रहेको बताउन चाहेको जानकारी दिए । ‘मैले डाक्टरलाई ठिक छु भनेको थिएँ, तर प्रशिक्षकले गलत संदेश पाएर परिवर्तन गर्न खोजेकोले यस्तो हुन पुग्यो । मेरो आशय प्रशिक्षकलाई अटेर गर्ने थिएन,’ केपाले थपे ।