एजेन्सी – स्पेनिस ला लिगा अन्तर्गत रियल म्याड्रिडले आइतबार भएको खेलमा लेभान्तेलै २-१ ले पराजित गरेको छ । रियलले गरेको दुवै पेनाल्टी गोल भिडियो असिस्टेन्ट रेफ्री (भीएआर) को मदतले टिकेको थियो ।

खेलको ४३ औं मिनेटमा लुका मोड्रीचको क्रसलाई एनिस बार्धीले मुख बचाउन खोज्दा हातले लागेपछि पनि पेनाल्टी दिएका थिएनन् । तर उनले भीएआरको सहयता लिँदै रियललाई पेनाल्टी दिए । करीम बेन्जेमाले उक्त पेनाल्टीमा गोल गर्दै रियललाई अगाडी बढाए । पहिलो हाफमा लेभान्तेका रोजर मार्टिको दुई प्रहार पोस्टमा लागेर फर्किएको थियो ।

रोजरले खेलको ६० औं मिनेटमा गोल गर्दै खेल बराबरीमा ल्याए । खेलको ७८ औं मिनेटमा रियलले अर्को पेनाल्टी पायो । चेक डुकुरेले क्यासेमिरोलाई पेनाल्टी क्षेत्रभित्र लडाएको भन्दै रेफ्रीले रियललाई पेनाल्टी दिए । लेभान्तेका खेलाडीहरुले क्यासेमिरोले डाइभ गरेको भनेपनि भीएआर टोलीसँग छलफल पछि रेफ्रीले आफ्नो निर्णय कायम राखे । बेलले उक्त पेनाल्टीमा गोल गर्दै रियललाई अग्रता दिलाए ।

यता लेभान्तेको दुई पेनाल्टी अवसरलाई भने रेफ्रीले नकार्दै भीएआरको सहयता पनि लिएनन् । ड्यानी कर्भाजलले लुइस मोरालेसलाई गरेको फल र राफेल भारानेको ह्यान्डलाई रेफ्रीले उचित कारवाही गर्न सकेनन् । रियलका नाचो फर्नान्डेज ८४ औं मिनेटमा दोहोरो पहेंलो कार्ड खाँदै बाहिरिएका थिए । लेभान्तेका रुबेन रोसिनापनि बेन्चमा रहेको अवस्थामा दोस्रो पहेंलो कार्ड खाँदै मैदान छाड्न बाध्य भए ।

यस जितसँगै रियल तेस्रो स्थानमा यथावत नै छ । रियलको २५ खेलमा ४८ अंक भएको छ । शीर्षस्थानको बार्सिलोनाले २५ खेलमा ५७ अंक जोड्दा दोस्रो स्थानको एतलेटिकोले २५ खेलमा ५० अंक जोडेको छ ।