काठमाडौं (हाम्रो खेलकुद) – एक गोलले पछि परेको स्थिति उल्ट्याएर विभागीय त्रिभुवन आर्मी क्लबले हिमालयन शेर्पा क्लबलाई पराजित गर्दै १७औं संस्करणको आहा रारा गोल्डकप फुटबल प्रतियोगिताको सेमिफाइनलमा स्थान बनाएको छ ।

पोखरा रंगशालामा आइतबार भएको खेलमा आर्मीले ३–१ को पुनागमन जित निकल्दै प्रतियोगिताको अन्तिम चारमा स्थान बनाएको हो । आर्मीको पुनरागमन जितमा नवयुग श्रेष्ठले दुई तथा जर्ज प्रिन्स कार्कीले एक गोल गरे । शेर्पाका प्याट्रिक गोहाले एक गोल गरे ।

प्रतिस्पर्धात्मक खेलमा शेर्पाले पहिलो हाफमा १–० को अग्रता बनाएको थियो । २७औं मिनेटमा प्याट्रिक गोहाले त्रिदेव गुरुङको पासमा गोल गर्दै शेर्पालाई शुरुवाती अग्रता दिलाएको थियो । तर, शारीरिक रुपमा बलिया आर्मीलाई शेर्पाले दोस्रो हाफमा रोक्न सकेन ।

दोस्रो हाफको ७१औं मिनेटमा आर्मीले बराबरी गोल फर्कायो । सन्तोष तामाङको फ्रिकिकमा नवयुगले हेडमार्फत बराबरी गोल फर्काएका थिए । ८०औं मिनेटमा नवयुगले व्यक्तिगत तथा टिमका लागि दोस्रो गोल गर्दै आर्मीलाई २–१ को अग्रता दिलाएका थिए ।

इन्ज्युरी समयको थप गरिएको पहिलो मिनेटमा जर्ज प्रिन्स कार्कीले गोल गर्दै आर्मीलाई ३–१ को जित दिलाए । कप्तान भरत खवासको शक्तिशाली प्रहारलै शेर्पाका गोलरक्षक किशोर गिरीले विफल पारेपनि रिवाउन्डमा जर्जप्रिन्स गोल गर्न सफल भए ।

दुई गोल गरेका आर्मीका नवयुग श्रेष्ठ खेलको म्यान अफ दि म्याच घोषित भए । उनले ५ हजार रुपैया पाए । प्रतियोगितामा सोमबार रुस्लान थ्री स्टार क्लब र युनाइटेड सिक्किम भारतबीच खेल हुने आयोजक सहारा क्लबले जनाएको छ ।