काठमाडौं (हाम्रो खेलकुद) – ए डिभिजन लिग च्याम्पियन सिग्नेचर मनाङ–मस्र्याङ्दी क्लबले मोफसलको गोल्डकपमा लगातार खराब प्रदर्शनलाई निरन्तरता दिंदा शनिबार १७औं आहा रारा गोल्डकप फुटबल प्रतियेगितामा विभागीय नेपाल एपीएफ क्लबसँग पराजित भएको छ ।

बाई पाएर सिधै क्वाटरफाइनल खेल खेलेको मनाङ आहा राराको आफ्नो पहिलो खेलमै एपीएफसँग १–० ले पराजित हुदै पहिलो चरणबाटै बाहिरिएको हो । एपीएफले यसअघि पहिलो खेलमा आयोजक सहारा क्लबलाई सडनडेथमा ५–४ ले पराजित गर्दै अन्तिम आठमा पुग्न सफल भएको थियो ।

पोखरा रंगशालामा शनिबार भएको खेलमा मनाङलाई पराजित गर्न प्रदीप लामाले दोस्रो हाफमा गरेको गोल निर्णायक बन्यो । खेलको ७१औं मिनेटमा सन्तोष श्रेष्ठको कर्नरलाई अनमार्क रहेका प्रदीपले हेडमार्फत गोल गरेका थिए । उनको हेड गोललाईनमा बसेका हेमन गुरुङले बचाउने प्रयास गरेपनि सफल भएनन् । खेलको अन्तिम समयतिर मनाङले लगातार दवाव सिर्जना गरेपनि हार टार्न सकेन ।

गोलकर्ता प्रदीप नै खेलको म्यान अफ दि म्याच घोषित भए । उनले ५ हजार रुपैयाँ पाए । त्यसअघि खेलको चौथो मिनेटमा मनाङका आफिज ओलेवोलाको प्रहार दोश्रो बारबाट थोरै बाहिरियो । २०औं मिनेटमा हेमन गुरुङको प्रहार एपिएफका गोलरक्षक अमृत चौधरीले बचाए । ७५औं मिनेटमा बिशाल राईको कर्नरमा प्रकाश वुढाथोकीको फितलो प्रहारले पोस्टको दिशा लिएन ।

प्रतियोगितमा आइतबारको त्रिभुवन आर्मी क्लब र हिमालयन शेर्पाबीच खेल हुने आयोजक सहारा क्लबले जनाएको छ । यसअघि मनाङ तिलोत्तमा गोल्डकपको क्वाटरफाइनलमा भ्याली च्यासल युथ क्लबसँग पराजित भएको थियो ।