एजेन्सी – कुनैपनि उपाधि रक्षा गर्नु सहज कार्य होइन । अझ विश्व फुटबलकै प्रतिष्ठित मानिने उपाधि एकपटक जित्नु नै कतिपय क्लबले नसकेको अवस्थामा लगातार उक्त उपाधि रक्षा गर्नु निकै ठूलो उपलब्धि हो । रियल म्याड्रिडले लगातार तेस्रो च्याम्पियन्स लिग उपाधि जित्दै युरोपको च्याम्पियनका रुपमा १ हजार दिन पूरा गरेको छ ।

सन् २०१६ मे २८ को दिन मिलानमा भएको फाइनलमा एटलेटिको म्याड्रिडलाई पराजित गर्दै जिनेदिन जिदानको प्रशिक्ष्कत्वमा पहिलो उपाधि जितेको थियो । समग्रमा रियलको यो ११ औं च्याम्पियन्स लिग उपाधि थियो । उक्त फाइनलमा पेनाल्टी सुटआउटमा रियलका लागि लुकास भाज्केज, मार्सेलो, ग्यारेथ बेल, सर्जियो रामोस र क्रिस्टियानो रोनाल्डोले लगातार गोल गरे । तर एटलेटिकोका लागि जुआनफ्रानले पेनाल्टीमा गोल गर्न नसक्दा रियलले उपाधि कब्जा गर्यो ।

लगत्तै अर्को सिजन रियलले अर्को इतिहास रच्ने सिलसिला सुरु गर्यो । नकआउट चरणमा नेपोली, बायर्न र एटलेटिको म्याड्रिडलाई पराजित गर्दै युभेन्ट्ससँग फाइनल भिडन्त तय गर्यो । त्यसबेलासम्म कुनै टोलीले च्याम्पियन्स लिगको उपाधि रक्षा नगरेको अवस्थामा फाइनलमा युभेन्ट्सलाई पराजित गर्दै रियलले नयाँ इतिहास रच्यो ।

रियलले त्यसपछि गत सिजन पनि लगातार तेस्रो उपाधि जित्ने अविश्वसनीय सफलताको प्रयास थाल्यो । नकआउट चरणमा पीएसजी, युभेन्ट्स र बायर्नलाई लगातार परास्त गरेको रियलले फाइनलमा लिभरपुललाई पन्छाउँदै लगातार तेस्रो उपाधि जित्यो । आजको मितिसम्म आइपुग्दा रियल लगातार १ हजार दिन युरोपको च्याम्पियन क्लबको रुपमा स्थापित भएको छ ।