एजेन्सी – फरवार्ड क्रिस्टोफ पियाटेकले आफ्नो उच्च लयलाई निरन्तरता दिएपछि इटालियन सिरी ए अन्तर्गत शुक्रबार एसी मिलानले एम्पोलीलाई ३-० ले पराजित गरेको छ । लगातार गोल गरिरहेका पियाटेकले गोलकर्ता सुचिमा लिओनेल मेसी र क्रिस्टियानो रोनाल्डोलाई पनि चुनौती दिएका छन् ।

पहिलो हाफ गोलरहित बराबरीमा सकिएपछि दोस्रो हाफको सुरुवातमै पियाटेकले मिलानलाई अग्रता दिलाए । उनले ४९ औं मिनेटमा गोल गर्दै मिलानको लागि छैटौं खेलमा सातौं गोल गरे । ५१ औं मिनेटमा फ्रान्क केसीले अग्रता दोब्बर पारे । ६७ औं मिनेटमा सामु कास्टिलेजोले गोल गर्दै मिलानको फराकिलो जित पक्का गरे ।

पियाटेकले सिरी ए मा मिलानको लागि पाँच खेल खेल्दै पाँच गोल गरेका छन् । त्यसअघि उनले जेनोआका लागि १९ खेलमा १३ गोल गरेका थिए । लिगमा कुल १८ गोल गरेका पियाटेक सर्वाधिक गोलकर्ताको सुचिमा रोनाल्डो भन्दा १ गोल पछाडी छन् । पोल्यान्डका २३ वर्षीय फरवार्ड जनवरीमा जेनोआबाट मिलान आएका थिए ।

मिलान आएपछि पियाटेकले आफ्नो लयलाई निरन्तरता दिंदै ऐतिहासिक सफलतासुरुवात पाएका छन् । उनी मिलानको लागि पहिलो रोजाइमा खेलेको सुरुवाती चारै खेलमा गोल गर्ने दोस्रो खेलाडी बनेका छन् । यसअघि सन् १९९८ ओलिभिएर बिएरहफले यस उपलब्धि हासिल गरेका थिए ।

पियाटेकले यस सिजन सबै प्रतियोगितामा २६ गोल गरेका छन् । युरोपको शीर्ष ५ लिगमा सर्वाधिक गोल गर्ने सुचिमा लिओनेल मेसी ३० गोल गरेर शीर्ष स्थानमा छन् । पियाटेकले कोपा इटालियामा जेनोआका लाही ६ र मिलानका लागि २ गोल गरेका छन् ।