एजेन्सी – युवा फरवार्ड किलियन एमबाप्पे पछिल्लो समय निकै उत्कृष्ट लयमा रहँदै आएका छन् । फ्रान्सलाई विश्वकप उपाधि दिलाउन महत्त्वपूर्ण भूमिका खेलेका एमबाप्पेले पीएसजीका लागि त्यसै लयलाई निरन्तरता दिइरहेका छन् ।

यसैबीच एमबाप्पेको प्रशंसामा अर्का फुटबलरले उनलाई रोक्न मेसीभन्दा पनि कठिन हुने बताएका छन् । फ्रान्सेली क्लब लियोनका ब्राजिलियन डिफेन्डर मार्सेलोले पछिल्लो समय दुवै खेलाडीसँग प्रतिस्पर्धा गरे । च्याम्पियन्स लिग अन्तर्गत मंगलबार राउन्ड अफ १६ को पहिलो लेगमा बार्सिलोना लियोनसँग गोलरहित बराबरीमा रोकिँदा मार्सेलोले उत्कृष्ट प्रदर्शन गरेका थिए । मेसी र सुआरेजजस्ता स्टार सम्मिलित बार्सिलोनालाई लियोनले गोल गर्ने मौका नै दिएन ।

मार्सेलोले खेलपछि बोल्दै मेसीले अपेक्षित प्रदर्शन गर्न नसक्दा खेलमा नतिजा बराबर भएको बताए । उनले यसको तुलनामा एमबाप्पेसँग खेल्दा निकै कठिन भएको पनि बताए । ‘एमबाप्पेविरुद्ध लिगमा खेल्दा मलाई निकै कठिन भयो । मेसीले हामीविरुद्ध राम्रो खेल्न सकेनन् । तर जस्तो खेल्ने शैली एमबाप्पेको छ, उनको तीव्र गति, पोजिसन र वन भर्सेस वनको स्थितिमा उनलाई रोक्न निकै गाह्रो हुन्छ,’ उनले भने ।

‘मेरो विचारमा एमबाप्पे छिट्टै नै विश्वको सर्वोत्कृष्ट खेलाडीको रुपमा अगाडी आउनेछन् । मेसी र रोनाल्डोको तुलनामा उनले सुधार गर्नुपर्ने केहि पक्ष छन् । तर जसरी उनले आफूलाई विकास गरेका छन्, उनले चाडैं सबैलाई उछिन्नेछन्,’ मार्सेलोले थपे । फ्रान्सले विश्वकप उपाधि जित्नुले लिग वनको स्तर उकास्नमा पनि निकै सहयोग पुगेको मार्सेलोले बताए ।