दीपक न्यौपाने, बुटबल

‘ए’ डिभिजन लिग च्याम्पियन सिग्नेचर मनाङ–मस्र्याङ्दी क्लबलाई स्तब्ध बनाउदै ललितपुरको भ्याली च्यासल युथ क्लब २१औं तिलोत्तमा गोल्डकप फुटबल प्रतियोगिताको सेमिफाइनलमा प्रवेश गरेको छ ।

बुटवल देवीनगरस्थित एन्फा टेक्निकल सेन्टरको मैदानमा बिहीबार भएको अन्तिम क्वाटरफाइनल खेलमा च्यासलले मनाङलाई १–० पराजित गर्दै अन्तिमा चारमा पुग्न सफल भएको हो । च्यासलको जितमा दोस्रो हाफमा एकमात्र निर्णायक गोल अर्मान्ड मोएनले गरे ।

प्रतिस्पर्धात्मक बनेको खेलको सुरुवातदेखि नै च्यासलले मनाङलाई कडा चुनौती दिएको थियो । तर, पहिलो हाफ गोलरहित बराबरीमा सकिएको थियो । दोस्रो हाफको शुरुमै च्यासलले फ्रिकिक पाएको थियो ।

४९औं मिनेटमा हेमन्त थापामगरको फ्रिकिकमा अर्मान्डले हेडमार्फत गोल गर्दै च्यासललाई सुरुवाती अग्रता दिलाएका थिए । एक गोलले पछि परेपछि स्टार खेलाडलिे भरिएको मनाङले खेलमा फर्कने प्रयास गरेपनि सफल हुन सकेन ।

यता, च्यासलले लिएको अग्रता अन्तिमसम्म जोगाइराख्न सफल भयो । अन्तिम १० मिनेट मनाङले च्यासललाई दवावमा राखेपनि गोलरक्षक दिनेश थापामगरले उत्कृष्ट प्रदर्शन गर्दै मनाङलाई निराश पारिदिए ।

उनले सुजल श्रेष्ठ, आफिज ओलावाले, अजिज, भिक्टर, शिव श्रेष्ठको प्रहारलाई लगातार विफल पारिदिए । इन्ज्युरी समयमा प्राप्त फ्रिकिकलाई मनाङले सदुपयोग गर्न सकेन । करिव ३० यार्डमा प्राप्त फ्रिकिकलाई प्रकाश बुढाथोकीले प्रहार गरेपनि पोलमा लाग्दै फर्किएको थियो ।

च्यासलका गोलरक्षक दिनेश थापामगर खेलको म्यान अफ दि म्याच घोषित भए । उनले १० हजार पाए । च्यासलले अब सेमिफाइनलमा विभागीय नेपाल पुलिस क्लबसँग शनिबार खेल्नेछ । प्रतियोगिता अन्तरगत शुक्रबार आयोजक लाली रुपन्देही–११ र डाफिन्स परिवार क्यामरुनबीच पहिलो सेमिफाइनल खेल हुनेछ ।