एजेन्सी – यूईएफए च्याम्पियन्स लिग फुटबलमा आज राति जर्मन क्लब साल्केले इंग्लिस क्लब म्यानचेस्टर सिटीलाई घरेलु मैदानमा आतिथ्यता गर्दैछ । च्याम्पियन्स लिग अन्तर्गतको प्रि–क्वाटरफाइनलको पहिलो लेगको खेल साल्केको घरेलु मैदानमा हुन लागेको हो । खेल नेपाली समयअनुसार आज राति १ः४५ बजेपछि हुनेछ ।

पछिल्लो समय उच्च प्रर्दशन गरिरहेको तथा उपाधिको दावेदारको रुपमा रहेको सिटीलाई रोक्न घरेलु टोलाीलाई कठिन हुने देखिन्छ । तर, जर्मन बुन्डेस लिगामा औसतको प्रदर्शन गरिरहेको साल्के सिटीलाई स्तब्ध पार्ने लक्ष्यमा मैदान उत्रनेछ । साल्केले पछिल्लो तीन संस्करणमा प्रि–क्वाटरफाइनल पार गर्न सकेको छैन । तर, साल्के घरेलु मैदानमा भएको च्याम्पियनस लिगको ९ खेलमा अपराजित रहेको छ । जसमा ६ जित र ३ बराबरी रहेको छ ।

यता, सिटी साल्केलाई पराजित गर्दै क्वाटरफाइनल यात्रालाई थप बलियो बनाउन चहान्छ । सिटी जर्मन प्रतिद्वन्द्वीविरुद्ध सन् २०१४ यता अपराजित छ । सिटी सन् २०१४ सेप्टेम्वरमा बायर्न म्युनिखसँग १–० ले पराजित भएको थियो । सिटीसँग सर्जियो अग्विरो, गाब्रियल जेसस, रहिम स्ट्रलिङ, लिरोए साने, रियाद महारेज, डेभिड सिल्भा, फर्नान्डिन्हो जस्ता विश्वस्तरीय खेलाडीहरुको साथ रहेको छ ।

पछिल्ला ५ खेलमा सिटीले ४ खेलमा जित हात पार्द १ मा हारको नतिजा निकालेको छ । यसक्रममा सिटीले बलियो आर्सनल र चेल्सीलाई पराजित गर्दै साल्केविरुद्धको खेलका लागि तयार रहेको संकेत दिएको छ । साल्के छाडेर अघिल्लो सिजन म्यानचेस्टर सिटी आएका जर्मन विंगर लेरोए सानेको लागि यस खेल विशेष हुनेछ ।

सिटी समूह ‘एफ’ को विजेता तथा साल्के समूह ‘डी’को उपविजेता बन्दै प्रि–क्वाटर फाइनलमा पुग्न सफल भएको थियो । दोस्रो लेग १३ मार्चमा सिटीको मैदानमा हुनेछ ।