एजेन्सी – युरोपेली क्लब फुटबलको सबैभन्दा चर्चित युइएफए च्याम्पियन्स लिग फुटबल अन्तरगतको प्रि–क्वाटरफाइनलको पहिलो लेगको खेलमा स्पेनिस क्लब एट्लेटिको मड्रिडले इटालियन क्लब युभेन्टसको सामना गर्दैछ । खेल एट्लेटिकोको घरेलु मैदान वान्डा मेट्रोपोलिटानोमा आज राति १ः४५ बजेपछि हुनेछ ।

घरेलु टोली मड्रिड युभेन्टसलाई पराजित गर्ने लक्ष्यमा मैदान उत्रनेछ । पछिल्लो समय यी दुई टोलीले दुईपटक खेलेका छन् । जसमा एट्लेटिकोले १ खेलमा जित र १ बराबरीको नतिजा निकालेको छ । इटालियन क्लबविरुद्ध डिएगो सिमोनीको नेतृत्वमा रहेको एट्लेटिकोले अहिलेसम्म हार बेहोरेको छैन । ६ खेलमध्ये एट्लेटिकोले ४ मा जित र २ बराबरीको नतिजा निकालेको छ । सोही प्रदर्शनलाई एट्लेटिको निरन्तरता दिने योजनामा हुनेछ ।

एट्लेटिकोसँग एन्टोइन ग्रिजमन, अल्भेरो मोराटा, भिटोलो, थोमस लेमार र साउल निग्वेजजस्ता खेलाडी छन् । गोलरक्षकमा जान ओब्लाक रहनेछन् । उनीहरुले जुनसुकै बेला पनि खेल परिवर्तन गर्न सक्छन् । स्पेनिस ला लिगामा एटलेटिको दोस्रो स्थानमा रहेको छ ।

यता, सिरी ‘ए’ मा अपराजित युभेन्टस घरेलु टोलीलाई पराजित गर्दै दोस्रो लेगलाई थप बलियो बनाउने योजनासहित मैदान उत्रनेछ । पछिल्ला दुई भेटमा युभेन्टसले एट्लेटिकोलाई पराजित गर्न सकेको छैन । यही जिन्कलाई युभेन्टस तोड्ने लक्ष्यमा हुनेछ ।

यसै सिजन स्पेनिस क्लब रियल मड्रिडबाट युभेन्टस् पुगेका क्रिस्टियानो रोनाल्डोको आगमनले उत्कृष्ट लयमा रहेको छ । युभेन्टसमा रोनाल्डोमात्रै नभएर मारियो म्यान्जुकिक, पाउलो डिबाला, जर्जियो किलियानी, लियोनार्डो बोनुची जस्ता खेलाडीहरु रहेका छन् ।

युभेन्टस समूह ‘एच’ को समूह विजेता तथा एट्लेटिको समूह ‘ए’ को उपविजेता टोली बन्दै प्रि–क्वाटरफाइनलमा प्रवेश गरेको थियो । दोस्रो लेग १३ मार्चमा युभेन्टसको मैदानमा हुनेछ ।