एजेन्सी – यूईएफए च्याम्पियन्स लिगअन्तर्गत प्रि–क्वाटरफाइनलमा आज राति इंग्लिस क्लब लिभरपुलले जर्मन क्लब बायर्न म्युनिखलाई घरेलु मैदानमा आतिथ्यता गर्दैछ । पहिलो लेगको खेल लिभरपुलको घरेलु मैदानमा आज राति १ः४५ बजेपछि हुनेछ ।

घरेलु टोली लिभरपुल बायर्नलाई पराजित गर्ने लक्ष्यमा मैदान उत्रनेछ । लिभरपुलले बायर्नसँगको सात खेलमध्ये एक खेलमा मात्रै पराजय भोगेका कारण टोली उच्च मनोवलका साथ मैदान उत्रनेछ । लिभरपुलले ४ मा जित र २ बराबरीको नतिजा निकालेको छ ।

च्याम्पियन्स लिग फुटबलमा लिभरपुल घरेलु मैदानमा पछिल्लो १९ खेलमा अपराजित छ । सन् २०१४ मा स्पेनिस क्लब रियल मड्रिडसँग ३–० ले पराजित भएयता लिभरपुल घरेलु मैदानमा अपराजित रहेको छ । जसमा १४ जित र ५ बराबरीको नतिजा रहेको छ । यो सिजन उच्च लयमा रहेको लिभरपुल प्रिमियर लिगको दोस्रो स्थानमा रहेको छ । लिभरपुल म्यानचेस्टर सिटीसँग गोल अन्तरमा पछि परेको हो ।

लिभरपुलसँग मोहम्मद सलाह, साडियो माने, रोबर्टाे फिर्मिनो र जद्रान शाकिरीजस्ता खेलाडीहरु रहेका छन् । भर्जिल भान डिजिक र एन्ड्रिउ रोबर्टसन भने कार्डको प्रतिबन्धमा छन् । तर, लिभरपुलका प्रशिक्षक जर्गेन क्लोपले घरेलु मैदानको फाइदा उठाउने बताएका छन् ।

यता, पछिल्ला खेलमा लिभरपुललाई पराजित गर्न नसकेको बायर्न लिभरपुललाई उसकै मैदानमा स्तब्ध पार्दै दोस्रो चरण प्रवेशको सम्भावनालाई बलियो बनाउने लक्ष्यमा हुनेछ । पछिल्लो ३ खेलमा अपराजित रहेको बायर्न लिभरपुलाई पराजित गर्दै जितको यात्रालाई निरन्तरता दिने योजनामा हुनेछ । बायर्नले थोमस मुलरलाई रातो कार्डका कारण गुमाउदा आर्जेन रोबेन र जेरेमी बोएटिङलाई चोटका कारण गुमाउनेछन् ।

तर, बायर्नसँग रोबर्ट लिवान्डोस्की, थियागो अलकान्टरा, किङ्सले कोमान र लियोन गोरेट्जका जस्ता उत्कृष्ट खेलाडीहरुको साथ रहनेछ । दोस्रो लेग बायर्नको मैदानमा १४ मार्चमा हुनेछ ।