काठमाडौं (हाम्रो खेलकुद) – रुस्लान थ्री स्टार क्लब भुटानमा जारी जिग्मे दोर्जी वाङचुक मेमोरियल गोल्डकपको सेमिफाइनलमा प्रवेश गरेको छ । शनिबार फुन्त्सोलिलिङमा भएको खेलमा थ्री स्टारले उग्वेन एकेडेमीलाई सडन डेथमा ५-४ ले पराजित गरेको हो ।

निर्धारित समयको खेल १-१ को बराबरीमा सकिएपछि खेलको नतिजा टाइब्रेकरबाट लिइएको थियो । वर्षाका कारण निकै कठिन मौसममा खेलको पहिलो हाफमा दुवै टोलीले गोल गर्न सकेनन् । दोस्रो हाफमा वर्षा भारी हुँदै गएपछि खेलाडीहरुलाई केहि कठिनाइ पनि देखिएको थियो ।

खेलको ६० औं मिनेटमा भुटानी टोली उग्वेनले अग्रता लिएको थियो । यशी दोर्जीले पेनाल्टी क्षेत्रको दायाँ भागबाट गोल गर्दै थ्री स्टारलाई समस्यामा पारेका थिए । तर त्यसको पाँच मिनेटमा नै थ्री स्टारले बराबरी गोल फर्कायो । गोलरक्षक ग्याल्जेन ज्याङपोको गल्तिको फाइदा उठाउँदै मिक्छेन तामाङले खाली पोस्टमा गोल गरेका थिए ।

टाइब्रेकरमा थ्री स्टारका लागि दिनेश राजवंशीको प्रहार विपक्षीले बचाएपनि एलेन न्यौपानेले उग्वेनका तेस्रो र पाँचौ प्रहार विफल पार्दै जित पक्का गरे । थ्री स्टारका रञ्‍जित धिमाल, सुनील बल, बुद्ध चेम्जोङ, अनन्त तामाङ र रुपेश केसीले गोल गरे । उग्वेनका थिन्ले दोर्जी र जिगेल ग्याल्जेनको प्रहारलाई एलेनले विफल तुल्याए । किन्ले तेन्जिङ, फुर्वा तेन्जिङ, यशी दोर्जी र ग्याल्जेन ज्याङपोको प्रहार गोल भएको थियो ।