एजेन्सी – ब्राजिलको राष्ट्रिय फुटबल टोलीले अर्को महिना दुई मैत्रीपूर्ण खेल खेल्दैछ । उक्त खेलका लागि स्टार फरवार्ड नेयमारको अनुपस्थितिमा रियल म्याड्रिडका युवा फरवार्ड भिनिसियस जुनियरले सिनियर टोलीबाट मौका पाउने भएका छन् ।

ब्राजिलले मार्च २३ मा पानामा र मार्च २६ मा चेक गणतन्त्रसँग मैत्रीपूर्ण खेल खेल्ने कार्यक्रम रहेको छ । उक्त दुई खेलका लागि प्रशिक्षक टिटेले रियल म्याड्रिडका १८ वर्षीय फरवार्ड भिनिसियसलाई टोलीमा समेट्ने बताएका छन् । टिटेका सहायक प्रशिक्षक सिल्भिन्होले उनको खेल पनि हेरिसकेका छन् ।

यसै वर्ष ब्राजिलमा हुने कोपा अमेरिकाका लागि टोलीका विकल्पका रुपमा पनि भिनिसियसलाई हेरिएको छ । हाल नेयमारको चोटका कारण युवा फरवार्ड भिनिसियसले जिम्मेवारी पूरा गर्न सके दुवै खेलाडीलाई कोपा अमेरिकामा सँगै प्रयोग गर्न सकिने विकल्प पनि हेरिनेछ । रियल म्याड्रिडमा सिजनको सुरुवातमा कमै मौका पाएका भिनिसियस पछिल्लो समय भने निकै राम्रो लयमा छन् ।

भिनिसियसको उत्कृष्ट लयका कारण रियलको टोलीमा इस्को, मार्को एसेस्न्सियोलगायतका खेलाडीलाई पनि सुरुवाती रोजाइमा स्थान बनाउन कठिन भइरहेको छ । रियलले लामो समयदेखि नेयमारलाई भित्र्याउने प्रयास गरेपनि पछिल्लो समय भिनिसियसको खेल प्रदर्शनले रियलका पदाधिकारी निकै प्रभावित हुँदै त्यसतर्फ नलाग्ने संकेत देखाएका छन् ।