बार्सिलोना (एजेन्सी)– पेरिस सेन्ट जर्मेन (पिएसजी) का स्टार नेयमार पुनः बार्सिलोना फर्कने सम्भावनाका विषयलाई बार्सिलोनाका अध्यक्ष जोसेप मारिया बार्टोमेउले अस्वीकार गरेका छन् । अध्यक्ष बार्टोमेउले आयक्सका रक्षक माथिस डे लिट प्रति भने क्लबको चासो रहेको बताएका छन् ।

नेयमार सन् २०१७ मा कीर्तिमानी रकम २ सय २२ मिलियन युरोमा बार्सिलोनाबाट पिएसजी पुगेका थिए । उनी पेरिस पुगेको केहि समययता देखि नै फेरि स्पेन फर्कने सम्भावना रहेको खबर चर्चामा थियो । तर, बार्सिलोना अध्यक्ष बार्टोमेउले भने ती सबै चर्चाको खारेज गरेका छन् ।

‘नेयमारसँग कुरा भएको छ । केहि पटक हाम्रो बीचमा भेट पनि भएको छ । तर कसैले पनि उनी फर्कन चाहेको बताएका छैनन्’ , उनले भने, ‘नेयमारको पीएसजीसँग सम्झौता छ । यो उनको दोस्रो सिजन हो । पीएसजीले उनलाई विक्री गर्छ भन्ने सोच्नु कठिन विषय हो । हामी त्यो चाहदैनौं पनि ।’

आयाक्सका डिफेन्डर डे लिटप्रति भने क्लबले इच्छा देखाएको छ । ‘हालै क्लबले आयक्सबाट फ्रेन्की डी जोङलाई भित्राएको छ । त्यसबाहेक लिज्टलाई पनि भित्राउन क्लबको योजना रहेको छ ।
उनी जस्तो खेलाडीप्रति हाम्रो रुचि छ । यो सत्या हो । हामी अर्को महत्वपूर्ण खेलाडी हुन्’, उनले भने, ‘मार्च वा अप्रिलमा हामी अझै विचार गर्नेछौं । हामीसँग अझै समय बाँकी छ । ‘