एजेन्सी – यूईएफए च्याम्पियन्स लिग अन्तरगको प्रि–क्वाटर फाइनलको पहिलो लेगमा आज राती इंग्लिस क्लब म्यानचेस्टर युनाइटेड र फ्रेन्च क्लब पेरिस सेन्ट जर्मन (पीएसजी) बीच प्रतिस्पर्धा हुदैछ ।

पहिलो लेगको खेल म्यानचेस्टर युनाइटेडको घरेलु मैदानमा नेपाली समयानुसार राति १ः४५ बजे हुदैछ । घरेलु टोली म्यानचेस्टर युनाइटेड चोटले ग्रस्त पीएसजीलाई पराजित गर्दै क्वाटरफाइन पुग्ने लक्ष्यमा मैदान उत्रनेछ । विश्व च्याम्पियन फ्रान्सका दुई प्रभावशाली खेलाडी पल पोग्बा र किलियन एमबाप्पे आमने सामने हुँदैछन् ।

अन्तरिम प्रशिक्षक ओले गनर सोल्सजरको प्रशिक्षण सम्हालेयता युनाइटेड ११ खेलमा अपराजित रहेको छ । यस क्रममा युनाइटेडले बर्नलीसँग मात्रै १–१ को बराबरी खेलेको छ । यही प्रदर्शनलाई युनाइटेड पीएसजीविरुद्धको खेलमा पनि निरन्तरता दिन चाहन्छ । युनाइटेडसँग रोमेलु लुकाकु, पल पोग्बा र एन्थोनी मार्सियलजस्ता खेलाडीहरु छन् । अन्य खेलाडीहरुले जुनसुकै बेला खेल आफ्नो पक्षमा पार्न सक्ने क्षमता राख्दछन् ।

यता चोटले ग्रस्त पीएसजी घरेलु टोलीलाई स्तब्ध पार्ने योजनामा मैदान उत्रनेछ । चोटका कारण मुख्य फरवार्ड नेयमार जुनियर, एडिन्सन काभनी र थोमस म्युनिएरलाई गुमाएको पीएसजी अग्रपङ्तिमा केलियन एमबाप्पेमा निर्भर रहनेछ । नेयमार जनवरी २३ मा भएको खेलमा एंकलमा चोट बोक्दै मैदान बाहिर रहेका छन् । उनी अप्रिलमा मैदानमा फर्कने सम्भावना रहेको छ । काभानीले लिग वानमा बोर्डेअक्सविरुद्ध १–० ले जित निकालेको खेलमा तिघ्रामा चोट बोकेका थिए ।

फरवार्डद्वय नेयमार र काभानी नभएपनि लिग वानको शीर्षस्थानमा रहेको पीएसजी युनाइटेडको अपराजित यात्रालाई पुर्णविराम लगाउने लक्ष्यमा हुनेछ । पीएसजीले पछिल्लो ५ खेलमध्ये एक खेलमा मात्रै हार बेहारेको छ । पछिल्लोपटक पीएसजी लिग वानमा लियोनसँग २–१ ले पराजित भएको थियो । त्यसयताको दुई खेलमा जित निकालेको पीएसजीले युनाइटेडविरुद्धको खेलको लागि तयार रहेको संकेत दिएका थिए ।

यि दुई अहिलेसम्म एक पटकमात्रै एक आपसमा प्रतिस्पर्धा गरेका छन् । सन् २०१५ मा नर्थ अमेरिकन च्याम्पिन्स कपमा प्रतिस्पर्धा गरेको थियो । जसमा पीएसजी २–० ले विजयी भएको थियो । दोस्रो लेग पिएसजीको घरेलु मैदानमा ७ मार्चमा हुनेछ ।

च्याम्पियन्स लिगमै आज राति इटालियन क्लब रोमा र पोर्चुगिज क्लब एफसी पोर्टाेबीच प्रतिस्पर्धा हुदैछ । पहिलो लेगको खेल रोमाको मैदानमा नेपाली समयानुअसार रातको १ः४५ बजे सुरु हुनेछ ।