काठमाडौं (हाम्रो खेलकुद) – मेची नेत्रालय काकरभिट्टा फुटबल टेनिङ सेन्टरलाई सडन डेथमा हराउँदै सिएमजी क्लब संकटा बुढासुब्बा गोल्ड कप फुटबल प्रतियोगिताको सेमिफाइनलमा पुगेको छ ।

आइतबार उद्घाटन खेल सडन डेथसम्म पुग्दा पनि खराब प्रकाशका कारण खेल स्थगित गर्नुपरेको थियो । समान ११ खेलाडीले पेनाल्टी हान्दा पनि नतिजा नआएको खेल सोमबार त्यहिबाट सुरु हुँदा संकटाले बाजी मारेको थियो ।

सोमबार मेचीका दिलेन लोक्तान गोल गर्न असफल भएका थिए । टोलीका लागि पुजन उपरकोटी गोल गर्न सफल भए । संकटाका लागि अमित तामाङ र सेड्रिक आबा दुवैले गोल गरे । जसबाट संकटा ११–१० ले विजयी भएको छ ।

निर्धारित समयको खेल २–२ को बराबरीमा सकिएपछि खेल टाइब्रेकरमा धकेलिएको थियो । १० औं मिनेटमा कर्ण लिम्बूको गोलबाट काकरभिट्टाले अग्रता लिएको थियो । कर्णले पेनाल्टी क्षेत्रभन्दा थोरै बाहिरबाट प्राप्त फ्रिकिकलाई गोलमा परिणत गरेका थिए ।

६० औं मिनेटमा संकटाले बराबरी गोल फर्कायो । सेड्रिक अबाको पासमा जय गुरुङले बराबरी गोल गरेका थिए । खेलको ६८ औं मिनेट पुजन उपरकोटीको हेलड गोलबाट पुनः अग्रता लियो । संकटाका गोलकिपर राजबाबु थापाले कर्नरमा आएको बल नियन्त्रण लिन नसकेको पुजन गोल गर्न सफल भएको थियो । इन्जुरी समयमा संकटाका दीपेश आलेमगरले गोल गरेपछि खेल टाइब्रेकरमा गएको थियो ।

तर टाइब्रेकरमाबाट पनि नतिजा निस्कन सकेन । पहिलो पाँच पेनाल्टीमा ४–४ को अवस्थामा सकिंदा खेल सडन डेथमा पुगेको थियो । ९–९ को स्थितमा छँदा दुवै तर्फका खेलाडीले बल देख्न नसक्ने जनाएपछि खेल स्थगित थियो । संकटाका गोलकिपर राजबाबु थापा म्यान अफ दी म्याच घोषित भए र उनले १५ हजार रुपैयाँ प्राप्त गरे ।