झापा (हाम्रो खेलकुद) – नेपाली राष्ट्रिय फुटबल टोलीका फरवार्ड नवयुग श्रेष्ठ र जुडोकी देविका खड्का झापा स्पोर्टस् अवार्ड २०७४ बर्ष उत्कृष्ट खेलाडी घोषित भएका छन् । नेपाल खेलकुद पत्रकार मञ्च समन्वय शाखा झापाले शनिबार बिर्तामोडमा भएको दोस्रो संस्करणको ‘झापा स्पोर्टस अवार्ड—२०७४’ मा नवयुगले उत्कृष्ट पुरुष र देविकाले वर्ष उत्कृष्ट महिला खेलाडीको अवार्ड प्राप्त गरेका हुन् ।

नवयुगले राष्ट्रिय टोलीका विशाल राई बी र अनन्त तामाङलाई पछि पार्दै अवार्ड जिते । नवयुग इलामका तथा विशाल र अनन्त झापाका हुन् । उत्कृष्ट महिला खेलाडी देवकी खड्काले करातेकी एस्तर राई र फुटबलकी अन्जिला तुम्बाफो सुब्बालाई पछि पारिन् ।

एपिएफका देविका र एस्तर झापाका हुन् । अन्जिला महिला राष्ट्रिय फुटबल टोलीकी गोलकिपर इलामकी हुन् । उत्कृष्ट खेलाडी बनेका नवयुगले यामाह कम्पनीको मोटरसाइकल र देविकाले स्कुटी प्राप्त गरे ।

भलिब प्रशिक्षक ताप्लेजुङका तेजप्रताप पतङ्वा सुब्बा लाइफटाइम अचिभमेन्ट अवार्डबाट सम्माति भएका थिए । उनले ३५ हजार रुपैयाँसहित सम्मानित भएका हुन् । सुब्बाले इस्ट होराइजन स्कुलको तर्फबाट १० हजार रुपैयाँ समेत प्राप्त गरे ।

स्वर्गिय आशिषविक्रम नेम्वाङप्रति समर्पित अवार्डमा वर्ष उत्कृष्ट युवा खेलाडीतर्फ एथलेटिक्सका प्रकाश दुनावार (झापा)घोषित भए । उनले एथलेटिक्सकै सविता कार्की (ताप्लेजुङ) र फुटबलकी सम्झना लावती (झापा) लाई पछि पारेका थिए ।

त्यसैगरी, वर्ष उत्कृष्ट प्रशिक्षकतर्फ क्रिकेटका विरु श्रेष्ठ अवार्ड जिते । उनले जुडोका गंगा खड्का र बक्सिङका डम्बर लिम्बूलाई पछि पारेका हुन् । मनोनयमा परेका प्रशिक्षक सबै झापाका हुन् । पुल्स च्वाइज प्लेयरको अवार्ड फुटबलका देवेन्द्र तामाङले हात पारे । उनी झापा ११ का डिफेन्डर हुन् ।

उत्कृष्ट युवा, प्रशिक्षक र पिपुल्स च्वाइज प्लेयरक विजेताले समान २५ हजार प्राप्त गरे । पुरस्कार राशी अखिल नेपाल फुटबल संघ (एन्फा) का उपाध्यक्ष पंकजविक्रम नेम्बाङले प्रदान गरेका हुन् । उत्कृष्ट पुरुष र महिला खेलाडीलाई मोटरसाइकल र स्कुटी झापा ११ एफसीका अध्यक्ष जलकुमार गुरुङले प्रायोजन गरेका हुन् ।

गत वर्ष झापाका खेलाडीलाई मात्र केन्द्रित गरेर प्रदान गरिएको अवार्ड यस वर्षबाट मेची अञ्चल भरिका खेलाडी तथा प्रशिक्षकलाई समेटिएरको खेलकुद पत्रकार मञ्च झापाले जनाएको छ ।