काठमाडौं (हाम्रो खेलकुद) – विभागीय टोली नेपाल एपीएफ क्लबलाई पराजित गर्दै क्यामरुनको दाउफिन्स फुटबल क्लबले मनकामना केवलकार पोखरा कप फुटबल प्रतियोगिताको उपाधि जितेको छ । पोखरा रंगशालामा आइतबार भएको फाइनलमा दाउफिन्स १-० ले विजयी भयो ।

दाउफिन्सका लागि विदेशी खेलाडी यानिक ओवानाले दोस्रो हाफको ५३ औं मिनेटमा गरेको गोल निर्णायक सावित भयो । उनी फाइनल खेलका म्यान अफ द म्याच पनि भए ।

क्यामरुनको टोली दाउफिन्सले नेपालमा खेलेको तेस्रो प्रतियोगितामा उपाधि जित्न सफल भएको हो । यसअघी खेलेका दुवै प्रतियोगितामा टोली पहिलो खेलमा पराजित भएको थियो ।

नेपाल एपीएफले जापानको रोस्सो विश्वविद्यालयलाई हराउँदै फाइनल पुगेको थियो । दाउफिन्सले भने मनाङ मर्स्याङदीलाई हराउँदै उपाधि भिडन्त पक्का गरेको थियो ।

कास्की जिल्ला फुटबल संघको आयोजनामा जारी प्रतियोगिताको विजेता दाउफिन्सले उपाधिसहित ७ लाख ५५ हजार रुपैयाँ प्राप्त गरेको छ । एपीएफले ४ लाखमा चित्त बुझायो । प्रतियोगिताको सर्वोत्कृष्ट खेलाडी एपीएफका राजु नगरकोटीले मोटरसाइकल प्राप्त गरे ।

प्रतियोगिताको विधागत उत्कृष्ट:
गोलरक्षक – राजु नगरकोटी (एपीएफ)
डिफेन्डर – रमेश दंगाल (एपीएफ)
मिडफिल्डर – हेमन गुरुङ (मनाङ)
फरवार्ड – यानिक ओवाना (दाउफिन्स)
प्रशिक्षक – राजेन्द्र तामाङ (एपीएफ)
जनही २५ हजार रुपैयाँ