पोखरा (हाम्रो खेलकुद)– पल्सर सहिद स्मारक ए डिभिजन लिग च्याम्पियन सिग्नेचर मनाङ मस्याङ्दी क्लब अर्को नकआउट फुटबल प्रतियोगिताको उपाधि दौडबाट बाहिरिएको छ । लिग च्याम्पियन बनेयता मनाङले कुनै नकआउट उपाधि जित्न सकेको छैन ।

मनकामना केबुलकार पोखरा कप फुटबल प्रतियोगिताको उपाधि दौडाबाट पनि मनाङ शनिबार बाहिरिएको छ । पोखरा रंगशालामा क्यामरुनको दाउफिन्स क्लबसँग सडन डेथमा पराजित हुँदै मनाङ सेमिफाइनलबाट बाहिरिएको हो ।

कमल श्रेष्ठको आत्मघाती गोलबाट दाउफिन्सले खेलको ६६ औं मिनेटमा अग्रता बनाएको थियो । तर आफिज ओलावालेको गोलबाट मनाङ खेलमा फर्केको थियो । खेल सकिन ९ मिनेट बाँकी रहँदा ओलावालले अन्जन विष्टले मिलाइदिएको बलमा ओलावालेले हेडमार्फत गोल गरेका थिए ।

निर्धारित समय, थप समय र टाइब्रेकर पनि बराबरी भएपछि सडन डेथमा क्यामरुन टोलीले बाजी मारेको थियो । मनाङ यसअघि सुदूरपश्चिम खप्तड गोल्ड कप र मदन भण्डारी इटहरी गोल्ड कपको फाइनल पुग्न सकेको थिएन । दाउफिन्स पनि ती दुवै प्रतियोगितामा फाइनल पुग्न सकेको थिएन ।

दाउफिन्सले अब विभागिय टोली नेपाल एपिएफ क्लबसँग फाइनल खेल्नेछ । जापानको रोस्सो विश्वविद्यालयलाई हराउँदै एपिएफ यसअघि नै फाइनल पुगिसकेको छ । कास्की जिल्ला फुटबल संघको आयोजनामा जारी प्रतियोगिताको फाइनल आइतबार हुनेछ । विजेताले उपाधिसहित ७ लाख ५५ हजार रुपैयाँ प्राप्त गर्नेछ ।