काठमाडौं (हाम्रो खेलकुद) – नेपाली राष्ट्रिय महिला फुटबल टोलीका प्रशिक्षक हरि खड्काले भारतमा शनिबार सुरु हुने हिरो गोल्डकप नेपालले सिक्ने अवसरका रुपमा लिने बताएका छन् ।

प्रतियोगिताको पूर्वसन्ध्यामा बोल्दै प्रशिक्षक खड्काले नेपालले साफ च्याम्पियनसिपको तयारीका रुपमा यस प्रतियोगितालाई हेरेको बताएका छन् । ‘हामी चार टोलीमध्ये सबैभन्दा कमजोर छौं । फिफाको वरियता अनुसार पनि हामी तल छौं । तर हामी यहाँ केहि सिक्न आएका हौं । आफ्नो कमजोरी सुधार्ने र बलियो पक्ष थाहा पाउने यो राम्रो अवसर हो,’ उनले भने, ‘ हामीले साफ च्याम्पियनसिपको लागि लामो तयारी गरेका छौं । यस प्रतियोगिताले हाम्रो तयारीमा थप सहयोग पुग्नेछ ।’

प्रशिक्षक खड्काले नेपाली टोलीले पछिल्लो समय निकै सुधार गरेको पनि बताए । ‘लामो समयदेखि भारतले दक्षिण एसियाली फुटबलमा वर्चस्व जमाएको छ । नेपालले पनि पछिल्लो समय सुधार गरेको छ । एन्फाले पनि महिला फुटबललाई प्राथमिकतामा राखेको छ । ओलम्पिक छनोटको नतिजाले पनि त्यसलाई प्रमाणित गरेको छ । यो सुधारलाई हामी अझै संघर्ष गरेर अगाडी बढाउने पक्षमा छौं,’ उनले भने ।

खड्काले नेपाली टोलीमा सबो खेलाडी राम्रो रहेको पनि बताए । ‘हाम्रो टोलीमा सबै खेलाडी राम्रा छन् । केहि यस्ता खेलाडी पनि छन् जसले खेलको नतिजा बदल्न सक्ने क्षमता राख्छन् । हामीले यसअघि म्यानमार र भारतसँग खेलिसकेका हुनाले उनीहरुलाई हाम्रो टोलीबारे थाहा पनि छ । इरानबारे भने हामी त्यति जानकार छैनौं,’ प्रशिक्षक खड्काले थपे ।

नेपालले प्रतियोगिताको पहिलो खेलमा म्यानमारकोसामना गर्दैछ । आयोजक भारत र इरानले दोस्रो खेलमा प्रतिस्पर्धा गर्नेछन् । प्रतियोगिताको फाइनल खेलमा शीर्ष दुई टोलीले अर्को शुक्रबार प्रतिस्पर्धा गर्नेछन् । नेपालले सोमबार भारत र बुधबार इरानसँग प्रतिस्पर्धा गर्नेछ ।