एजेन्सी – लिग लिडर बोरुसिया डर्टमन्ड जर्मन कपको प्रि–क्वाटरफाइनलबाटै बाहिरिएको छ । डर्टमन्ड घरेल मैदानमा वेडर ब्रेमेनसँग पेनाल्टी सुटआउटमा ४–२ ले पराजित हुदै प्रि–क्वाटरफाइनलबाटै बाहिरिएको हो ।

डर्टमन्डले खेलमा तीपटक अग्रता लिएर पनि अग्रता जोगाउन असफल बन्यो । निकै नै रोमाञ्चक र नाटकीय बनेको खेलको निर्धारित समय ३–३ गोलको बराबरीमा सकिएपछि खेलको निर्णय पेनाल्टी सुटआउटबाट लिइएको हो । पेनाल्टी सुटआउटमा वेडर ब्रेमनका क्लाउडियो पिजारो, म्याक्सिमिलियन एगेस्टिन, डाभी क्लासिन र म्याक्स क्रुसले गोल गरे । डर्टमन्डका एक्सेल विस्टेल र जुलियन विगेलले मात्रै गोल गर्न सफल भए । फ्रान्सिस्को एल्कासेर र म्याक्सिमिलियन फिलिपले गोल गर्न सकेनन् ।

त्यसअघि खेलको पाँचौ मिनेटमा मिलन रासिकाले गोल गर्दै वेडरलाई सुरुवाती अग्रता दिलाए ।
पहिलो हाफको इन्ज्युरी समयको थप गरिएको तेस्रो मिनेटमा मार्काे रिउसले बराबरी गोल फर्काए ।
प्रतिस्पर्धात्मक बनेको निर्धारित समयको खेल बराबरीमा सकिएपछि खेल अतिरिक्त समयमा पुगेको थियो ।

१०५औं मिनेटमा क्रिस्टियन पुलिसिले गोल गर्दै डर्टमन्डलाई २–१ ले अग्रता दिलायो । १०८औं मिनेटमा क्लाउडियो पिजारोले खेललाई पुनः २–२ को बराबरीमा ल्याए । ११३औं मिनेटमा अचराफ हाकिमीले गोल गर्दै खेलमा पुनः डर्टमन्डले ३–२ को अग्रता बनायो । तर, ११९औं मिनेटमा मार्टिन हार्निकले गोल गर्दै खेललाई पेनाल्टी सुटआउटमा धकेले ।