लन्डन (एजेन्सी)– म्यानचेस्टर सिटीका प्रशिक्षक पेप ग्वार्डिओलाले टोटनह्याम, चेल्सी र म्यानचेस्टर युनाइटेड लिभरपुल र सिटीसँगै प्रिमियर लिग उपाधि दौडमा रहेको बताएका छन् ।

प्रिमियर लिगमा लिभरपुलले लगातार दोस्रो खेलमा बराबरी खेल्दै अंक गुमाएपछि सिटीले बुधबार अंक बराबर गरेको छ । सोमबार मात्रै लिभरपुलले वेस्टह्यामसँग १–१ को बराबरी खेलेको थियो । लिभरपुल र सिटीको ६२ तथा टोटेनह्यामको ५७ अंक छ ।

चौथो स्थानको चेल्सी लिभरपुलभन्दा १२ अंकले पछाडि छ । जबकी युनाइेटडले नयाँ प्रशिक्षकको आगमनसँगै पछिल्ला ८ मध्ये ७ खेलमा जित हासिल गरेको छ । अहिले युनाइटेड चेल्सीभन्दा २ अंकले पछाडि छ ।

‘टोटेनह्याम वा चेल्सी उपाधि दौडमा छैन मैले कहिल्यै भनेको छैन’ , ग्वार्डिओलाले भने, ‘५ वा ६ टोली जहिले पनि प्रतिस्पर्धा हुन्छ । त्यसमा युनाइटेडले हरेक हप्ता राम्रो खेल्दैछ । जसले गर्दा युनाइटेड पनि प्रिमियर लिग दौडमा फर्केको छ ।’

आउने दिनमा चेल्सीले पनि सबै खेलमा सफल नतिजा ल्याउन सके प्रिमियर लिगको दाबेदारका रुपमा देखिने ग्वार्डिओलाले बताए । उनले भने, ‘सबै दौडमा छन्, यो अंक अन्तर ठूलो होइन ।’ अझै थुप्रै खेल खेल्नुछ । जहाँ की ९ वा १० अंकको फरक ठूलो होइन’, उनले थपे, ‘प्रिमियर लिगको अहिलेको अवस्था हेर्दा जुन सुकै टोली पनि अंकका लिन तयार छन् । साविक विजेता सिटी गत मंगलबार न्युक्यासलसँग स्तब्ध भएको थियो ।’

त्यो अवस्थामा लिभरपुलले सिटीसँगको दुरी ७ अंकमा पुर्याउन सक्थ्यो । तर योर्गन क्लोपको लिभरपुल गत बुधबार लेस्टरसँग बराबरीमा रोकियो । अर्को खेलमा सिटीले आर्सनलाई हराउँदै लिभरपुलमाथि दबाब बढाएको थियो । सिटीले बुधबार राति एभरटनलाई हराउँदै अंक बराबरी गरेको हो ।