एजेन्सी – यो सिजन खराव प्रदर्शन गरिरहेको रियल मड्रिडले लगातार पाँचौ जित निकाल्दै लयमा फर्किएको संकेत दिएको छ । रियले डिर्पोटिभो अलाभेसमाथि ३–० को सहज जित निकाल्दै यो सिजन लगातार पाँचौ जित निकाल्न सफल भएको हो ।

यो सिजन रियलले यसअघि लगातार चार खेलमा जित हात पारेको थियो । घरेलु मैदान सान्टियागो बर्नबेउमा आइतबार राति भएको खेलमा रियललाई जिताउन करिम बेन्जेमा, भिनिसियस जुनियर र मारियानो डियाजले गोल गरे ।

३०औं मिनेटमा करिम बेन्जेमाले गोल गर्दै रियललाई १–० को अग्रता दिलाए । उनले सर्जियो रिगुइलनको पासमा गोल गरेका थिए । पहिलो हाफमा १–० को अग्रता लिएको रियलले दोस्रो हाफमा २ गोल गर्न सफल भयो । ८०औं मिनेटमा भिनिसियस जुनियरले गोल गर्दै रियलले २–० ले अघि बढाए । उनले मार्काे एसेन्सियाको पासमा गोल गरेका थिए ।

इन्ज्युरी समयको थप गरिएको पहिलो मिनेटमा वैकल्पिक खेलाडी मारियानो डियाजले अल्भेरो ओर्डिजोलाको पासमा गोल गर्दै रियललाई ३–० को सहज जित दिलाए । मारियानो डियाज ७५औं मिनेटमा करिम बेन्जेमाको स्थानमा मैदान प्रवेश गरेका थिए । यससँगै रियलले पहिलो राउन्डमा बेहोरेको हारको बदला लिएको छ । रियल पहिलो राउन्डमा १–० ले पराजित भएको थियो ।

जितसँगै रियलले दोस्रो स्थानको शहरी प्रतिद्धन्द्धी एट्लेटिको मड्रिडसँगको अंक दुरी २ मा झारेको छ । रियलको ४२ अंक पुगेको छ । एट्लेटिकोको ४४ अंक रहेको छ । शीर्षस्थानमा रहेको बार्सिलोनाको ५० अंक रहेको छ । अलाभेस ३२ अंक जोडेर सातौ स्थानमा छ ।

आइतबार राति नै भएको अर्काे खेलमा एट्लेटिको मड्रिड रियल बेटिससँग १–० ले पराजित भएसँगै शीर्षस्थानको बार्सिलोनासँगको अंक दुरी छोट्याउने मौका गुमाएको छ ।