म्यानचेस्टर (एजेन्सी)– एन्टोनियो मार्सियलले म्यानचेस्टर युनाइटेडसँगको यात्रालाई थपेका छन् । नयाँ सम्झौतापछि अब उनी सन् २०२५ सम्म ओल्ड ट्राफोडमा रहने भएका छन् । सिजनको सुरुवातमा फ्रान्सेली स्टारका विषयमा विभिन्न चर्चा चलेका थिए ।

युनाइटेडमा उनको भविष्य शंकाको घेरामा परेको थियो । क्लबका पूर्व प्रशिक्षक जोसे माउरिन्होको नजरमा उनी खासै पर्न सकेका थिएनन् । तर, माउरिन्होको यात्रा युनाइटेडमा सिजनको बीचमै टुंगियो । नयाँ प्रशिक्षकको आगमसँगै मार्सियल टोलीका उच्च प्रदर्शनकर्ता मध्ये रहन सफल भए ।

युनाइटेडले मार्सिलयलसँग २०२४ सम्मका लागि सम्झौता भएको औपचारिक घोषणा गरेको छ । त्यसपछि उनले अर्को एक वर्ष क्लबसँगको सम्झौता थप्न सक्ने विकल्प पनि राखिएको छ ।

‘मलाई यो क्लबमा बिताएका हरेक समय महत्त्वपूर्ण छन् ,’ सम्झौतापछि मार्सियलले भनेका छन्, ‘जुन दिन म युनाइटेडमा आबद्ध भए । त्यो दिन देखि आफुलाई क्लबको हिस्सा मानेको छु । क्लबलाई परिवार ठानेको छु । क्लबका समर्थकले देखाएको अपार माया र समर्थनप्रति आभारी छु । ‘

उनले क्लबका सबैलाई धन्यवाद दिएका छन् । ‘म प्रशिक्षण टोलीका हरेक सदस्यलाई धन्यवाद दिन चाहन्छु । जसले मेरो खेललाई अर्को स्तरमा पुर्याउन मद्दत गरेका छन्, ‘उनले थपे, ‘क्लबले आउने दिनमा थ्रुपै सफलता प्राप्त गर्नेछ । म त्यसका लागि पुरा प्रयास गर्नेछु ।’

मोनाकोबाट युनाइटेड पुगेयता उनले १ सय ६२ खेल खेलेका छन् । २०१५ मा लिभरपुलविरुद्ध खेल्दै युनाइटेडबाट डेब्यू गरेका उनले अहिले सम्म ४६ गोल गर्नुका साथै २२ गोलमा एसिस्ट गरेका छन् ।

युनाइटेडका नयाँ प्रशिक्षक ओले गुनार सोल्सजरले मार्सियलसँगको नयाँ सम्झौताप्रति खुसी व्यक्त गर्दै प्रतिभावान यी खेलाडीसँग हरेक प्रशिक्षकले काम गर्न चाहने बताएका छन् ।