पोखरा (हाम्रो खेलकुद)- क्यामरुनको दाफिन्स फुटबल टोली पोखरामा जारी छैटौ मनकामना केवलकार पोखरा कप फुटबलको क्वाटरफाइनलमा प्रवेश गरेको छ ।

पोखरा रंगशालामा बुधबार भएको दोस्रो क्वाटरफाइनल खेलमा दाफिन्सले ‘ए’ डिभिजन क्लब भ्याली च्यासल युथ क्लबलाई १–० ले पराजित गर्दै अन्तिम आठमा पुग्न सफल भएको हो ।

दाफिन्सको जितमा यान्निकले पहिलो हाफमा गरेको गोल नै निर्णायक बन्यो । यान्निकले खेलको २५औं मिनेटमा गोल गरेका थिए । १ गोलले पछि परेपछि च्यासलले गोल फर्काउने बराम्बार प्रयास गरेपनि दाफिन्सका गोलरक्षक प्रिसोले उच्च प्रदर्शन गर्दै च्यासललाई स्तब्ध पारे । प्रिसो नै खेलको म्यान अफ दि म्याच घोषित भए ।
प्रतियोगिता अन्तरगत बिहीबार ब्रिगेड ब्वाइज र पोखरा–११ बीच खेल हुने आयोजकले जनाएको छ ।
यसअघि मंगलबार एपीएफले हिमालय शेर्पा क्लबलाई २–१ ले परजित गर्दै क्वाट फाइानलमा स्थान बनाइसकेको छ
कास्की जिल्ला फुटबल संघको आयोजनामा पोखरा रंगशालामा हुने प्रतियोगितामा दुई विदेशी टिमसहित १२ टोलीको सहभागिता रहेको छ । दुई विदेशी टोलीमा जापानको रिस्से विश्व विद्यालय र क्यामरुनको दाफिन्ट फुटबल टोली रहेका छन् । नेपालका मनाङ–मस्र्याङदी, संकटा, थ्री स्टार, त्रिभुवन आर्मी, नेपाल पुलिस, एपीएफ, हिमालयन शेर्पा, च्यासल, ब्रिगेड ब्वाइज र आयोजकको पोखरा–११ रहेका छन् ।
विजेताले ७ लाख ५५ हजार र उपविजेताले ४ लाख ५ हजार रुपैयाँ पुरस्कार प्राप्त गर्नेछन् । उत्कृष्ट खेलाडीलाई मोटरसाइकल प्रदान गरिनेछ । पाँच विधाका उत्कृष्ट खेलाडीले जनही २५ हजार पाउने छन् ।