एजेन्सी – इंग्लिस प्रिमियर लिग फुटबलमा म्यानचेस्टर युनाइटेड हारबाट जोगिएको छ । इन्ज्युरी समयमा निल्ससन लिन्डलफले गोल गरेपछि युनाइटेड बर्नलीसँगको सम्भावित हारबाट जोगिएको हो ।

युनाइटेड घरेलु मैदानमा २–० ले पछि परेको स्थिति उल्ट्याएर बर्नलीसँग खेल २–२ गोलको बराबरीमा खेलेको हो । यससँगै युनाइटेडको शत प्रतिशत जित यात्रामा पूर्णविराम लागेको छ । युनाइटेड अन्तरिम प्रशिक्षक ओलने गनर सोल्सजरको प्रशिक्षणमा लगातार ८ खेलमा जित आत्मसात गरेको थियो ।

ओल्ड ट्राफोर्डमा मंगलबार राति भएको प्रतिस्पर्धात्मक खेलको पहिलो हाफ गोलरहित बराबरीमा सकिएको थियो । ५१औं मिनेटमा एस्ले बार्नेसको गोलबाट युनाइटेड खेलमा पछि परेको थियो । ८१औं मिनेटमा क्रिस वुडले गोल गरेपछि युनाइेड खेलमा २–० ले पछि परेको थियो ।

तर, त्यसपछि युनाइटेडले उच्च प्रदर्शन गर्दै दुई गोल गर्दै बराबरी गर्न सफल भयो । ८७औं मिनेटमा पल पोग्वाले पेनाल्टीमार्फत गोल गर्दै युनाइटेडलाई खेला फर्कने संकेत गरेका थिए । इन्ज्युरी समयको थप गरिएको तेस्रो मिनेटमा निल्ससन लिन्डलफले गोल गर्दै युनाइटेडलाई हारबाट जोगाए ।

बराबरी युनाइटेडले चौथो स्थानमा रहेको चेल्सीसँगको अंक बराबरी गर्ने मौका गुमायो । युनाइटेड २४ खेलबाट ४५ अंक जोडेर छैटौ स्थानमा झरेको छ । बर्नली २३ अंक जोडेर १५औं स्थानमा छ ।