जापान एसियन कपको फाइनलमा

एजेन्सी – एसियन पावर हाउस जापान एसियन कप फुटबलको फाइनलमा प्रवेश गरेको छ । जापानले इरानलाई ३–० ले पराजित गर्दै एसियन कपको उपाधिनजिक पुगेको हो ।

संयुक्त अरब इमिरेट्स (युएईं) स्थित हाज्जा विन जायद स्टेडियममा सोमबार राति भएको खेलमा जापानलाई जिताउन युया ओसाकोले २ तथा जिन्की हारागुचीले एक गोल गरे । प्रतिस्पर्धात्मक बनेको खेलको पहिलो हाफमा गोलरहित बराबरीमा सकिएको थियो । तर, दोस्रो हाफमा जापानले उत्कृष्ट प्रदर्शन गर्दै ३ गोल गर्न सफल भयो ।

५६औं मिनेटमा युया ओसाकोको गोलबाट जापानले खेलमा अग्रता बनाएको थियो । युयाले ताकुमी मिनामिनोको पासमा गोल गरेका थिए । ६७औं मिनेटमा युयाले पेनाल्टीमार्फत गोल गर्दै जापानलाई २–० को अग्रता दिलाए । इन्ज्युरी समयको थप गरिएको दोस्रो मिनेटमा ताकुमी मिनामिनोको पासमा जिन्कीले गोल गर्दै ३–० को जित दिलाए ।