एजेन्सी – फरवार्डद्धय करिम बेन्जेमा र ग्यारेथ बेलले गोल गरेपछि रियल मड्रिडले स्पेनिस ला लिगा फुटबलमा इस्पान्योललाई ४–२ ले पराजित गरेको छ ।

इस्पान्योलको मैदानमा आइतबार राति भएको खेलमा रियललाई जिताउन करिम बेन्जेमाले दुई तथा ग्यारेथ बेल र कप्तान सर्जियो रामोसले समान एक गोल गरे । इस्पान्योलका लियो बापपटस्टाओ र रोबर्टाे रोसेल्सले गोल गरे ।

खेलको चौथो मिनेटमा नै करिम बेन्जेमाको गोलबाट रियलले खेलमा अग्रता बनाएको थियो । १५औं मिनेटमा कप्तान रामोसले लुका मोड्रिचको क्रस पासमा हेडमार्फत गोल गर्दै अग्रता दोब्बर बनायो । २५औं मिनेटमा घरेलु टोलीका लियो बापटिसटाओले गोल गर्दै खेललाई २–१ को स्थितिमा ल्याए । पहिलो हाफको इन्ज्युरी समयको थप गरिएको पहिलो मिनेटमा करिम बेन्जेमाले व्यक्तिगत दोस्रो तथा टिमका लागि तेस्रो गोल गर्दै रियललाई ३–१ को अग्रता दिलाए ।

वैकल्पिक खेलाडीको रुपमा मैदान प्रवेश गरेका ग्यारेथ बेलले ६७औं मिनेटमा गोल गर्दै रियललाई ४–१ को अग्रता दिलाए । बेल ६४औं मिनेटमा भिनिसियस जुनियरको स्थानमा मैदान प्रवेश गरेका थिए । बेलले मैदान प्रवेश गरेको तेस्रो मिनेटमै गोल गर्न सफल भएका हुन्  । बेलले चोटबाट पूनरागमन गरेको पहिलो खेलमै गोल गर्न सफल भएका हुन् । उनले चोटका कारण यसअघिका ६ खेल गुमाएका थिए ।

७२औं मिनेटमा रियल १० खेलाडीमा समेटियो । रियलका राफयल भरान रातो कार्ड खादै मैदानबाट बाहिरिए । त्यसको फाइदा उठाउदै इस्पान्योलका रोबर्टाे रोसेल्सले ८१औं मिनेटमा गोल गरेपनि टिमको हार टार्न सकेनन् ।

इस्पान्योलमाथिको जितसँगै रियल २१ खेलबाट ३९ अंक जोडेर लिगको तेस्रो स्थानमा उक्लन सफल भएको छ । रियल शीर्षस्थानको बार्सिलोनाभन्दा १० तथा एट्लेटिको मड्रिडभन्दा ५ अंकले पछि छ । इस्पान्योल २४ अंक जोडेर १५औं स्थानमा रहेको छ ।