एजेन्सी – वेल्स तथा स्पेनिस महारथी रियल मड्रिडका फरवार्ड ग्यारेथ वेल प्रशिक्षणमा फर्किएका छन् । बेलसँगै मार्काे एसेन्सियो पनि शनिबार रियलका टिम सहकर्मीसँग सँगै प्रशिक्षण गरेका छन् ।

ला लिगा अन्तर्गत सन् २०१९ को पहिलो खेलमा भिल्लारियलविरुद्ध बेलले काल्फ़मा चोट बोकेका थिए । खेल २–२ गोलको बराबरीमा सकिएको थियो । त्यसयता बेलले चोटका कारण ६ खेल गुमाएका थिए । बेलविना ६ खेल खेलेको रियलले दुई खेल गुमाएको थियो ।

बेल आज राति इस्पान्योलविरुद्धका खेलमा मैदान उत्रने सम्भावना छ । उनलाई मैदान उतार्न प्रशिक्षक सान्टियागो सोलारीले जोखिम मोलेका छन् । रियल र इस्पान्योलबीचको खेल आज राति १ः३० बजे इस्पान्योलको मैदानमा हुदैछ ।

रियल शीर्षस्थानको बार्सिलोनाभन्दा १० अंकले पछि परेको छ । रियल ३६ अंक जोडेर चौथो स्थानमा रहेको छ । रियलले सुरुवाती २० खेलमध्ये ६ खेल गुमाइसकेको छ । बार्सिलोना ४६ अंकसहित शीर्ष स्थानमा रहेको छ । ४४ अंक जोडेको एट्लेटिको मड्रिड दोस्रो तथा सेभियाले गोलअन्तरमा रियललाई पछि पार्दै तेस्रो स्थान रहेको छ ।

रियलका बेलसँगै, टोनी क्रुस, मार्काे एसेन्सियो र केलर नाभास चोटबाट पुनरागमन गर्ने तयारीमा छन् । केही खेलमडीहरु चोटबाट फर्कदै गर्दा रियलका समर्थकहरुले दोस्रो सेसनमा रियलले राम्रो प्रदर्शन गर्ने अपेक्षा रोखेका छन् ।