एजेन्सी – इटालियन सिरी ‘ए’ फुटबलमा एसी मिलान र नेपोलीले गोलरहित बराबरी खेल्दै अंक बाँडेका छन् । मिलानको घरेलु मैदानमा भएको खेलमा दुवै टोलीले गोलका केही अवसर सिर्जन गरेपनि त्यसलाई सदुपयोग गर्न नसक्दा अंक बाड्न बाध्य भए ।

खेलको छैटौं मिनेटमा नेपोलीका ड्रिज मर्टेन्सले गोलको सुन्दर मौका खेर फालेका थिए । २३औं मिनेटमा घरेलु टोलीका सुसो प्रहार क्रसबारमा लाग्दै बाहिरियो । ६४औं र ६७औं मिनेटमा नेपोलीका जिलिन्स्कीको दुई प्रहारलाई मिलानका गोलरक्षक जियानलुजी डोनररुम्माले बचाइदिए ।

दुई दिनअघि मात्रै लोनमा मिलान पुगेका पियाटिकले ७६औं मिनेटमा गोलको सुन्दर मौका खेर फाले । ७९औं मिनेटमा पियाटिकको हेडरमा डिफेन्डर मुसाचियोले गोल गर्न सकेनन् । ८७औं मिनेटमा मिलानका गोलरक्षकले जेलिन्स्कीको प्रहारलाई विफल पारिदिए ।

खेलको अन्त्यतिर नेपोली १० खेलाडीमा समेटियो । फावियन दोहोरो पँहेलो कार्ड खादै इन्ज्युरी समयको थप गरिएको तेस्रो मिनेटमा मैदानबाट बाहिरिएको थिए ।

बराबरीपछि नेपोलीले शीर्षस्थानमा रहेको युभेन्टससँगको अंक दुरी कम गर्ने मौका गुमायो । नेपोली २१ खेलबाट ४८ अंकसहति दोस्रो स्थानमा छ । मिलान ३५ अंक जोडेर चौथो तथा इन्टर मिलान ४० अंक जोडेर तेस्रो स्थानमा छ । युभेन्टस ५६ अंकसहित सिरी ‘ए’ को शीर्षस्थानमा रहेको छ ।