एजेन्सी – जर्मन बुन्डेस लिगाको शीर्षस्थानमा रहेको बोरुसिया डर्टमुन्डले ९ अंकको अग्रता बनाएको छ । बुन्डेस लिगा अन्तरगत शनिबार राति भएको खेलमा ह्यानोभर ९६लाई ५–१ को फराकिलो गोल अन्तरले पराजित गर्दै डर्टमुन्डले ९ अंकको अग्रता बनाउन सफल भएको हो ।

डर्टमन्डको २१ खेलबाट ४८ अंक पुगेको छ । दोस्रो स्थानमा रहेको बोरुसिया मोन्चेन्ग्लाडबाकको समान खेलबाट ३९ अंक रहेको छ । एक खेल कम खेलको साविकको विजेता बायर्न म्युनिखको ३९ अंक नै छ ।

घरेलु मैदान सिग्नल इडुना पार्कमा शनिबार राति भएको खेलमा डर्टमुन्डलाई फराकिलो जित दिलाउन आचरफ हाकिमी, मार्काे रिउस, मारियो गोट्जे, राफायल गुरेरियो र एक्सेल विटसेलले गोल गरे । पराजित टोलीका लागि मार्भिन बाकालर्जले सान्त्वना गोल फर्काए ।

प्रतिस्पर्धात्मक बनेको खेलको पहिलो हाफमा घरेलु टोलीले १–० को अग्रता बनाएको थियो । डर्टमन्डका आचरफ हाकिमीले खेलको २४औं मिनेटमा राफयल गुरेरोको पासमा गोल गरेका थिए । ६०औं मिनेटमा मार्काे रिउसले हाकिमीकै पासमा गोल गर्दै डर्टमन्डको अग्रता दोब्बर बनाए । त्यसको दुई मिनेट पछि नै जाडन सान्चोको पासमा मारियो गोट्जेले गोल गर्दै डर्टमन्डलाई ३–० को अग्रता दिलाए ।

६७औं मिनेटमा राफायल गुरेरोले मार्काे रिउसको पासलाई सदुपयोग गरेपछि डर्टमन्ड ४–० ले अघि बढ्यो । ८६औं मिनेटमा मर्भिन बाकालर्जले गोल गर्दै खेललाई ४–१ को स्थितिमा ल्याए । तर, खेलको ९०औं मिनेटमा एक्सेल विटसेलले गोल गर्दै डर्टमन्डलाई ५–१ को फराकिलो जित दिलाए ।

डर्टमुन्डसँगको हारसँगै ह्यानोभर ११ अंक जोडेर रेलिगेसन जोनको १७औं स्थानमा रहेको छ ।

बुन्डेस लिगाका अन्य खेलका नतिजाहरु
हर्था बर्लिन विरुद्ध साल्के (२–२)
बोरुसिया मोन्चेग्लावाच विरुद्ध अग्सवर्ग (२–०)
फ्रेइवर्ग विरुद्ध होफेनाइन (२–४)
मेइन्ज विरुद्ध नर्नवर्ग (२–१)
वल्सवर्ग विरुद्ध बायर लिभरकुसेन ( ०–३)
वेर्डेर ब्रेमेनविरुद्ध फ्रान्कफर्ट (२–२)