एजेन्सी – एट्लेटिको मड्रिडले गेटाफेलाई २–० ले पराजित गर्दै स्पेनिस ला लिगा फुटबलमा शीर्ष स्थानमा रहेको बार्सिलोनासँगको अंक दुरी २ मा झारेको छ ।

एट्लेटिकोको २१ खेलबाट ४४ अंक पुगेको छ । एक खेल कम खेलेको बार्सिलोनाको ४६ अंक रहेको छ । बार्सिलोनाले आइतबार राति जिरोनासँग प्रतिस्पर्धा गर्दैछ ।
घरेलु मैदान वान्डा मेट्रोपोलिटानोमा भएको खेलमा एट्लेटिकोलाई जिताउन एन्टोइन ग्रिजमन र साउल निग्वेजले गोल गरे । थोमसको पासमा एन्टोइन ग्रिनमनले गोल गर्दै घरेलु टोलीलाई अग्रता दिलाएका थिए । ३८औं मिनेटमा साउलले गोल गर्दै एट्लेटिकोको अग्रता दोब्बर बनायो ।

दोस्रो हाफमा घरेलु टोलीले बल पोजेसन राखेपनि थप गोल गर्न नसक्दा पहिलो हाफको दुई गोल नै एट्टिकोको जितमा पर्याप्त बन्यो । खेलको अन्त्यतिर गेटाफे ९ खेलाडीमा समेटिएको थियो । गेटाफेका डिज्ने ८८औं मिनेटमा दोहोरो पहँेलो कार्ड तथा इन्ज्युरी समयको थप गरिएको दोस्रो मिनेटमा लियान्द्रो कावारेरा दोहोरो पँहेलो कार्ड खादै मैदानबाट बाहिरिएका थिए । एट्लेटिकोसँगको हारपछि गेटाफे ३१ अंक जोडेर छ्रैटौ स्थानमा रहेको छ ।

शनिबार राति नै भएको खेलमा सेभियाले लेभान्टेलाई ५–० को फराकिलो अन्तरले पराजित गर्दै ला लिगाको तेस्रो स्थानमा उक्लन सफल भएको छ । सेभियाले रियल मड्रिडलाई पछि पारेको हो । सेभियाले रियलसँगको अंक बराबरी गरेपनि हेड टु हेडमा तेस्रो स्थानमा उक्लिएको हो । सेभिया र रियलको समान ३६ अंक छ । रियले एक खेल कम खेलेको छ ।
सेभियाको फराकिलो जितमा विसाम विन यडर, आन्द्र सिल्भा, फ्रान्को भाज्क्वेज, पाब्लो साराविया र क्वीन्सी प्रोमेसले गोल गरे ।