आर्सनललाई हराउँदै म्यानचेस्टर युनाइटेड एफए कपको पाँचौ चरणमा

एजेन्सी – प्रिमियर लिग प्रतिद्वन्द्वी आर्सनललाई पराजित गर्दै म्यानचेस्टर युनाइटेड एफए कपको पाँचौ चरणमा प्रवेश गर्न सफल भएको छ ।

शुक्रबार राति भएको चौथो चरणको खेलमा युनाइटेडले आर्सनललाई उसकै मैदानमा ३–१ ले पराजित गर्दै एफए कपको पाचौ चरणमा पुग्न सफल भएको हो । युनाइटेडको सहज जितमा एलेक्सिस साञ्चेज, जेसे लिङ्गार्ड र एन्थोनी मार्सियलले गोल गरे । आर्सनलका पिएरे इम्रिक औवामियाङले गोल गरे ।

रोमेलु लुकाकुको पासमा एलेक्सिस साञ्चेजले गोल गर्दै युनाइटेडलाई सुरुवाती अग्रता दिलाएका थिए । त्यसको दुई मिनेटपछि नै लुकाकुकै पासमा जेसे लिङ्गार्डले गोल गरेपछि युनाइटेडले २–० को अग्रता बनायो ।

४३औं मिनेटमा पिएरे इम्रिक औवामियाङले गोल गर्दै आर्सनललाई खेलमा फर्काउने संकेत दिएका थिए । उनले एलेक्जेन्डर लाकाजेटको पासमा गोल गरेका थिए । तर, ८२औं मिनेटमा मार्सियलले गोल गर्दै युनाइटेडलाई ३–१ को सहज जित दिलाए ।

अन्तरिम प्रशिक्षक ओले गनर सोल्सजरको प्रशिक्षणमा युनाइटेडको यो शतप्रतिशत आठौं जित हो ।
शुक्रबार राति नै भएको अर्काे खेलमा ब्रिस्टल सिटीले बोल्टन वन्डरसलाई २–१ ले पराजित गर्दै पाचौ चरणमा पुग्न सफल भयो ।