एजेन्सी – कप्तान सर्जियो रामोसको दुई गोल मद्दतमा स्पेनिस महारथी रियल मड्रिडले स्पेनिस कोपा डेल रे फुटबलको पहिलो लेगमा जिरोनालाई ४–२ ले पराजित गरेको छ ।

घरेलु मैदान सान्टियागो बर्नबेउमा रियलले १–० ले पछि परेको स्थिति उल्ट्याएर जिरोनामाथि जित निकाल्न सफल भएको हो । रियलको जितमा कप्तान सर्जियो रामोसले दुई तथा लुकास भास्क्वेज र करिम बेन्जेमा गोल गरे । जिरोनाका एन्थोनी लोजानो र एलेक्स ग्रानेलले गोल गरे ।

घरेलु टोली खेलको सातौ मिनेटमा एन्थोनी लोजानोको गोलबाट पछि परेको थियो । उनले राहुल गार्सियाको पासलाई सदुपयोग गरेका थिए । खेलमा पछि परेपछि रियलले जिरोनाको अग्रतालाई लामो समय टिक्न दिएन । १८औं मिनेटमा लुकास भास्क्वेजले अल्भेरो ओड्रिजोलाको पासमा गोल गर्दै खेललाई १–१ गोलको बराबरीमा ल्याए ।

४२औं मिनेटमा रियलका भिनिसियस जुनियरलाई लोजानोले बक्सभित्र लडाएपछि रियलले पेनाल्टीको मौका पायो । कप्तान सर्जियो रामोसले सदुपयोग गर्दै रियललाई पहिलो हाफमा २–१ को अग्रता दिलाए । ६६औं मिनेटमा मार्काेस लोरेन्टेले बक्सभित्र ह्यान्ड गरेपछि जिरोनाले पेनाल्टीको अवसर पायो । एलेक्स ग्रानेलले सदुपयोग गर्दै खेललाई २–२ गोलको बराबरीमा ल्याए ।

७७औं मिनेटमा मार्सेलोको फ्रिकिकमा रामोसले हेडरमार्फत गोल गर्दै रियललाई ३–२ ले अगाडी बढाए । त्यसको तीन मिनेटपछि नै भिनिसियस जुनियरको पासमा करिम बेन्जेमाले गोल गर्दै रियललाई ४–२ को जित दिलाए ।

जितसँगै रियलले क्वाटरफाइनलको पहिलो लेगमा अग्रता बनाउन सफल भएको छ । दोस्रो लेग अर्काे साता जिरोनाको घरेलु मैदानमा हुनेछ ।