एजेन्सी – प्रिमियर लिग प्रतिद्वन्द्वी टोटेनहम हस्टपरलाई पेनाल्टी सुटआउटमा पराजित गर्दै चेल्सी इंग्लिस फुटबल लिग कप (इएफएल) अर्थात कारवाओ कपको फाइनलमा प्रवेश गरेको छ ।

दोस्रो लेगमा चेल्सीले २–१ को जित निकालेपनि समग्रमा २–२ गोलको बराबरी भएपछि खेल पेनाल्टी सुटआउटमा पुगेको हो । पहिलो लेगमा चेल्सी १–० ले पछि परेको थियो । पेनाल्टी सुटआउटमा चेल्सीक विलियन, सेजर एज्पीलिक्वेटा, जर्गिन्हो र डेभिड लुइजले गोल गरे । टोटेनहमका क्रिस्टियन इरिक्सन र इरिक लमेलाले मात्रै गोल गर्न सके । इरिक डाएरको प्रहार आकसिंदा लुकास मौराको पेनाल्टी चेल्सीका गोलरक्षक किपा एरिजाबालागाले बचाए ।

त्यसअघि घरेलु मैदानमा बिहीबार राति भएको खेलमा एङ्गोलो कान्टेको गोलबाट चेल्सीले खेलमा सुरुवाती अग्रता बनाएको थियो । ३८औं मिनेटमा इडेन हाजार्डले गोल गर्दै चेल्सीको अग्रता दोब्बर बनाए । ५०औं मिनेटमा फर्नान्डो लोरेन्टेले गोल गर्दै खेललाई २–१ को स्थितिमा ल्याउदै खेललाई समग्रमा २–२ को बराबरीमा ल्याएका थिए । त्यसपछि थप गोल निस्कन नसक्दा चेल्सी विजयी भएपनि समग्रमा २-२ को बराबरी हुँदा खेल पेनाल्टी सुटआउटमा धकेलिएको थियो ।

अब चेल्सीले उपाधिका लागि म्यानचेस्टर सिटीसँग खेल्नेछ । फाइनल खेल वेम्वली स्टेडियममा २४ फेब्रुअरीमा हुनेछ । सिटीले तेस्रो डिभिजनको क्लब बर्टन अल्वियोनलाई समग्रमा १०–० को जित निकाल्दै फाइनलमा स्थान बनाइसकेको छ ।